საპარლამენტო უმრავლესობის წევრი სოზარ სუბარი, რომელიც არის "ხალხის ძალის" ლიდერი, ამბობს, რომ მსოფლიო თითქოს გადაიღალა უკრაინაში რუსეთის ომზე საუბრით და ახლა მარტო მათ მიერ ინიციცირებული კანონპროექტს განიხილავენ. ტელეკომპანია "იმედის" ეთერში 23 თებერვალს მან თქვა, რომ ეს მათი რეკლამაა.
"უკვე ერთი წელია ლაპარაკობს: "უკრაინის ომი", "უკრაინის ომი", "რუსეთის აგრესია უკრაინაში", "რუსეთის აგრესია უკრაინაში', თითქოს დაიღალნენ, გადაიღალნენ. მანამდე იყო უამრავი სხვა თემა, ხან ჩინეთსა და ტაივანს შორის დაიძაბებოდა, ხან სადღაც და, გადაიღალნენ ამ თემებით.
ახლა დაწყებული ამერიკის სახელმწიფო დეპარტამენტის პრესსპიკერით, სენატორები, ევროსაბჭო, ევროპარლამენტი, ევროპელი ლიდერები, ჩვენი ოპოზიცია და არასამთავრობოები, მარტო ამაზე ლაპარაკობენ, კარგია რომ ასეთი აღიარება ხდება "ხალხის ძალის", ეს ჩვენი რეკლამაა", - თქვა სოზარ სუბარმა.
იმის მიუხედავად, რომ "უცხოური გავლენის გამჭვირვალობის შესახებ" კანონპროექტით საქართველოს სტრატეგიული პარტნიორი ქვეყნებიდან დაფინანსებული ორგანიზაციები "უცხოური გავლენის აგენტებად" უნდა დარეგისტრირდნენ, სუბარი ფიქრობს, რომ ეს იქნება შანსი მათთვის საკუთარი საქმე უკეთ წარმოაჩინონ. აქვე მან ისაუბრა, ღიად პრორუსულ მედიაორგანიზაცია "ალტ-ინფოზეც".
"ყველას და ყველაფერს ["ანლტ-ინფო"] ერთი კანონით ვერ მოჰფენ ნათელს, მაგრამ ეს ძალიან მნიშვნელოვანი კანონია: ვინც კარგ საქმეს ემსახურება, მათ მეტი საშუალება ექნება საზოგადოებას თავის სიკეთეებზე ელაპარაკოს, ხოლო ვისაც ბნელი გეგმები აქვს, მათ გეგმებს ნაწილობრივ მაინც მოჰფენს ნათელს.
თუ ვიღაცა ძირგამომთხრელ საქმიანობას ეწევა სახელმწიფოს წინააღმდეგ და წმინდა ჯაშუშური სქემით მუშაობს, იმათთვის ეს კანონი ვერ იმუშავებს, ამისთვის არსებობენ სპეცსამსახურები..." - ამბობს საპარლამენტო უმრავლესობის დეპუტატი.
კიდევ ერთი საკითხი, რომელზეც სოზარ სუბარმა ისაუბრა, დონორებისგან მიღებული დაფინანსების ხელისუფლების წინააღმდეგ გამოყენებაა. აქვე მან აღნიშნა, რომ არასამთავრობო ორგანიზაციებში მუშაობის დროსაც კი ქვეყანას ემსახურებოდა.
"მე მთელი ჩემი ცხოვრება ვემსახურებოდი საქართველოს და ძალიან მცირე ნაწილია აქედან და იმ ნაწილშიც ძალიან კარგ საქმეს ვემსახურებოდი, რომელიც შეიძლებოდა ყოფილიყო გრანტებთან დაკავშირებული... სწორედ იმიტომ, რომ ვმუშაობდი არასამთავრობო სექტორშიც და თან იმ პერიოდში, როცა მოხდა ვარდების რევოლუცია, იმანაც ჩემ თვალ წინ ჩაიარა, როგორ იქნა გამოყენებული გარკვეული დაფინანსებები რევოლუციის მოსახდენად და შესამზადებლად, მაშინ, როცა ამ გრანტების მიზანი იყო ადამიანის უფლებების დაცვა..." - თქვა სოზარ სუბარმა.
