საქართველოს ისტორიაში უმნიშვნელოვანესი დღეა, 32 წლის წინ ქართველმა ხალხმა რეფერენდუმზე დაადასტურა სურვილი ქვეყნის დამოუკიდებლობის თაობაზე, – ამის შესახებ „ნაციონალური მოძრაობის“ წევრმა, დავით კირკიტაძემ საქართველოს პირველ არხს განუცხადა.
მისივე თქმით, მნიშვნელოვანია, რომ პრეზიდენტი დღეს პარლამენტში წარდგება. როგორც კირკიტაძე ამბობს, ისურვებდა, რომ სალომე ზურაბიშვილმა პოზიტიური როლი ითამაშოს ევროპულ გზაზე.
„დღეს ასევე არის ზვიად გამსახურდიას დაბადების დღე და მნიშვნელოვანია, რომ პრეზიდენტი დღეს პარლამენტში მობრძანდება. თავის დროზე შეცდომა დაუშვა და არასწორად შეაფასა ის მოვლენები, რაც ზვიად გამსახურდიას თავს ხდებოდა. ვისურვებდი, იგივე შეცდომა მეორედ არ გაიმეოროს. მას ხელეწიფება, თავს აგვარიდოს დიდი სირცხვილი, დიდი ცოდვა და სახელმწიფოებრივი ტრაგედია, რაც პირველი პრეზიდენტის თავს მოხდა და რასაც დღეს ვუყურებთ. მას შეუძლია, ეს გამოასწოროს. ვისურვებდი, საქართველოს პრეზიდენტმა ითამაშოს პოზიტიური როლი ევროპულ გზაზე და აღარ დაუშვას ის ლაფსუსი, რაც უკვე გითხარით“, – განაცხადა დავით კირკიტაძემ.
დავით კირკიტაძემ კითხვის საპასუხოდ განმარტა, რატომ შეიცვალა პოზიცია და წინა შემთხვევებისგან განსხვავებით, დღეს პარლამენტში სალომე ზურაბიშვილის გამოსვლას დაესწრება.
„პრეზიდენტის ბოლოდროინდელი განცხადებები – სამწუხაროდ, მხოლოდ განცხადებები და არა ქმედებები – გარკვეულწილად იმსახურებს ყურადღებას და ფრთხილ ოპტიმიზმს, რომ მას ნამდვილად სურს ჩვენი ქვეყნის ევროპული ინტეგრაცია და მას ამ გზაზე საზოგადოების მხარდაჭერა სჭირდება“, – განაცხადა დავით კირკიტაძემ.
სალომე ზურაბიშვილი დღეს პარლამენტის წინაშე წლიური ანგარიშით წარდგება.
