დახურული შეხვედრა იყო და დეტალებთან დაკავშირებით ვერ ვისაუბრებ, თუმცა, მინდა, ხაზგასმით გითხრათ, იმ სიბინძურეს, რაც მიმდინარეობს მოსამართლეების და სასამართლო სისტემის მიმართ, არ ვაპირებ, ავყვე, – ამის შესახებ იუსტიციის უმაღლესი საბჭოს წევრმა, სააპელაციო სასამართლოს უვადო მოსამართლემ, ლევან მურუსიძემ საქართველოს პრემიერ-მინისტრთან შეხვედრის შემდეგ განაცხადა.
მურუსიძის თქმით, დახურულ შეხვედრაზე პრემიერ-მინისტრს ყველანაირი ინფორმაციას მიაწოდა.
„როდესაც სხვა ქვეყნის პოლიტიკური თანამდებობის პირი გამოსცემს აქტს, ჩვენ, მოსამართლეები პოლიტიკურად ხომ ვერ ვისაუბრებთ. აქედან გამომდინარე, საქმის კურსში ჩავაყენეთ ჩვენი ქვეყნის პირველი პირი, ვთხოვეთ მას, რომ მობრძანებულიყო და გავანდეთ ჩვენი წუხილები. მიმაჩნია, რომ სუვერენიტეტის, დამოუკიდებლობის, უსაფრთხოების გარანტი არის საქართველოს პრემიერ-მინისტრი. რაც შეეხება მტკიცებულებებს და, ზოგადად, იმ ინფორმაციას, რა ხდებოდა და როგორ ხდებოდა სასამართლო ხელისუფლების წინააღმდეგ, როდესაც ჩავთვლი საჭიროდ, ამას საზოგადოება შეიტყობს. ველოდები კიდევ ბევრ სიბინძურეს, ფეიკნიუსებს, დაბრალებებს – სხვათა შორის, უნიჭოდ ექნება ადგილი – ამას ველოდები და, შესაბამისად, როგორც კი ჩავთვლი საჭიროდ, ამას საზოგადოება შეიტყობს. ყველა ინფორმაცია დახურულ შეხვედრაზე გაჟღერდა“, – განაცხადა მურუსიძემ.
