უკრაინა ომის დასრულების შემდეგ ნატო-ში თუ არ გაწევრიანდება, ევროპაში ნამდვილი მშვიდობა ვერ იქნება, – ამის შესახებ ლატვიის პრემიერ-მინისტრმა, კრისიანის კარინსმა განაცხადა.
ლატვიის პრემიერ-მინისტრმა ხაზი გაუსვა უკრაინის შემდგომი სამხედრო დახმარების აუცილებლობას, „რაც საჭიროა, ყველაფრით, ვიდრე ქვეყანა ამ ომში საბოლოოდ არ დაამარცხებს სრულიად გაუმართლებელ აგრესიას, რომელსაც რუსეთი ახორციელებს სუვერენული ქვეყნის წინააღმდეგ“.
კარინსმა განაცხადა, რომ ომის დასრულების შემდეგ უკრაინის ჩრდილოატლანტიკურ ალიანსში გაწევრიანება სავალდებულოა.
„ბოლოს და ბოლოს, აშკარად ჩანს, რომ ომის დასრულების შემდეგ, იმისთვის, რომ ევროპაში მშვიდობა და უსაფრთხოება რეალობად იქცეს, უკრაინა ნატო-ს წევრი ქვეყანა უნდა იყოს“,- განაცხადა კარინსმა ბრიუსელში, ნატო-ს გენერალურ მდივანთან, იენს სტოლტენბერგთან გამართულ პრესკონფერენციაზე.
შეგახსენებთ, უკრაინის პრეზიდენტმა, ვოლოდიმირ ზელენსკიმ განაცხადა, რომ უკრაინა ნატო-ს წევრი უნდა გახდეს შვედეთის შემდეგ, თუმცა ამასთან ერთად ისიც თქვა, რომ უკრაინა ომის მიმდინარეობისას ალიანსში გაწევრიანებას ვერ შეძლებს.
