ევროპის საბჭოს საპარლამენტო ასამბლეამ პლენარულ სესიაზე ლაჩინის დერეფანში შექმნილი ვითარების შესახებ რეზოლუცია დაამტკიცა.
48 ხმით 16-ის წინააღმდეგ ასამბლეამ დაამტკიცა რეზოლუცია, რომლის თანახმად, შეფერხებულია ხალხისა და საქონლის თავისუფალი, უსაფრთხო გადაადგილება ლაჩინის დერეფნის გავლით და მოუწოდა ბაქოს, დაუყოვნებლივ შეასრულოს ადამიანის უფლებათა ევროპული სასამართლოს მიერ მიღებული გადაწყვეტილება.
გარდა ამისა, ევროპარლამენტარები მოუწოდებენ აზერბაიჯანს, მიიწვიოს ევროპის საბჭოს დელეგაცია ლაჩინის დერეფანში და მთიან ყარაბაღში ფაქტების დადგენის მისიით.
„მივიღე დადასტურებული ინფორმაცია ლაჩინის დერეფანში არსებულ ვითარებასთან დაკავშირებით, რომლის მიხედვითაც, აზერბაიჯანმა გზის ორივე მხარეს დაამონტაჟა ბეტონის ბარიერები, რის გამოც მანქანების მოძრაობა შეუძლებელია. ძალიან დამთრგუნველია ამ ამბის მოსმენა დღეს, როდესაც ჩვენ ამ საკითხს განვიხილავთ“, – განაცხადა ირლანდიელმა დეპუტატმა, პოლ გავანმა.
პოლ გავანის მიერ მომზადებული მოხსენების საფუძველზე, ამ საკითხზე გადაუდებელი დებატების შემდეგ ასამბლეამ ხაზგასმით აღნიშნა, რომ აზერბაიჯანს აქვს „პასუხისმგებლობა, დაიცვას და უზრუნველყოს ყველა ადამიანის უსაფრთხოება, რომელიც ცხოვრობს საერთაშორისოდ აღიარებულ საზღვრებში“.
