„ეს უკვე ფიზიკური ძალის გამოყენებით წამების ფაქტია" - განაცხადა დღეს, 9 ნოემბერს, ცენტრ "ემაპთიას" ხელმძღვანელმა, მარიამ ჯიშკარიანმა გუშინ, გლდანის მე-18 დაწესებულებაში განვითარებულ მოვლენებზე საუბრისას.
შეგახსენებთ: გუშინ, 8 ნოემბერს, საქართველოს მესამე პრეზიდენტი, მიხეილ სააკაშვილი რუსთავის 12-ე სასჯელაღსრულების დაწესებულებიდან გლდანის ციხეში გადაიყვანეს. როგორც სააკაშვილი აცხადებს, ის სასწრაფოს მანქანიდან მისი ნების საწინააღმდეგოდ, ძალის გამოყენებით გადაიყვანეს და მიწაზე ათრიეს.
„ხელისუფლებამ არამარტო ფსიქოლოგიური ზეწოლა განახორციელა მოშიმშილე პატიმარზე, არამედ, უკვე ფიზიკური ძალის გამოყენებით განახორციელა წამების ფაქტი. უპირებდნენ ნემსის გაკეთებას, რაც ყოვლად დაუშვებელია. არანებაყოფლობითი მკურნალობა მხოლოდ სასამართლოს ნებართვით არის შესაძლებელი.
იუსტიციის მინისტრის გუშინდელი განცხადება, რომ თურმე, მიხეილ სააკაშვილმა ბადრაგებზე განახორციელა ზეწოლა და დაამტვრია აპარატურა, რა თქმა უნდა, უკვე არის დარღვევა. იუსტიციის მინისტრი უკვე უნდა იყოს გადაყენებული თანამდებობიდან", - ამბობს ჯიშკარიანი.
