საპარლამენტო უმრავლესობის ლიდერის მამუკა მდინარაძის განცხადებით, „ქართული ოცნების“ მიერ მომზადებული ცვლილებების მიზანია ოჯახური ღირებულებების, არასწრულოვნების დაცვა და არა რაიმეს აკრძალვა.
როგორც მდინარაძემ აღნიშნა, უფლებები და პროპაგანდა ერთმანეთისგან გასამიჯნია.
„ბავშვებს უკვე ქართულ ენაზე ნათარგმნ ანიმაციურ პროპაგანდისტულ ფილმებს აყურებინებენ. ბავშვებს ანიმაციურ ფილმში რომ უქადაგებ, ბედნიერება ამის გარეშე წარმოუდგენელია, ეს პროპაგანდის კლასიკური მაგალითია. ჩვენ ვცდილობთ, უფლებები და პროპაგანდა ერთმანეთისგან გავმიჯნოთ და გავაცალკევოთ. პროპაგანდისტები კი ცდილობენ, პროპაგანდა და უფლებები ერთმანეთში აურიონ. ეს მთავარი ღირებულებითი ხაზია და ამ ხაზზე ბრძოლა, ღირებულებითი ომი მიმდინარეობს, რაშიც ვერ გაიმარჯვებენ, რადგან მართლები ვართ.
მგონი, მათ ჰომოფობიის მნიშვნელობა არ იციან. მოდით, ბევრჯერ კარგად ავუხსნათ, ჰომოფობია რას ნიშნავს. უფლებებს მიჯნავ პროპაგანდისგან და მავნე შედეგისგან. სინამდვილეში, რაიმეს აკრძალვა კი არ ხდება, უპირატესი მიზანია მომავალი თაობების დაცვა მავნე, საშინელი პროპაგანდის შედეგებისგან, ამისგან შვილებისა და შვილიშვილების დაცვა. დიახ, პრიორიტეტი ოჯახური ღირებულებებისა და არასწრულოვნების დაცვაა და არა რაღაცის აკრძალვა. ამ ყველაფერს ერთმანეთში ურევენ, ჩვენ კი, უფლებების და პროპაგანდის ერთმანეთისგან გამიჯვნას ვცდილობთ.
ოპოზიცია ამ ცვლილებებს ხან ფაშიზმს დაუძახებს, ხან ჰომოფობიას. მათი კამპანია აგებულია იმაზე, თითქოს ეს ჰომოფობიური კანონპროექტია. ანუ, ბავშვებისა და ოჯახური ღირებულებების დაცვა ჰომოფობიაა. წარმოიდგინეთ, რაზე დავიდნენ, რაზე აკეთებენ შტურმს. დაიწყებენ ხალხის მოტყუებას, რომ ნაწარმოებს აკრძალავენო, საოცრებებს ილაპარაკებენ, რასაც არ დავუშვებთ. ამ პიარულ ბრძოლაშიც გავიმარჯვებთ, რადგან მართლები ვართ“, – განაცხადა მამუკა მდინარაძემ.
პარტია „ქართულმა ოცნებამ“ ოჯახურ ღირებულებათა და არასრულწლოვანთა დაცვის შესახებ საკონსტიტუციო ცვლილებები მოამზადა.
