ევროპის ჩემპიონატზე საქართველოსა და ესპანეთის წყვილში გამარჯვებული გერმანიას შეხვდება. ტურნირის მასპინძელმა გერმანიამ მერვედფინალში დანიას დამაჯერებელი თამაშით 2:0 მოუგო.
ფაქტები
- დანიის ნაკრები ევროპის ჩემპიონატებზე მასპინძლებთან ექვსჯერ დამარცხდა. პირველად 1988 წელს გერმანიასთან (1:2), მეექვსედ – ევრო 2024-ზე, ისევ გერმანიასთან.
- 35-ე წუთზე მატჩის არბიტრმა გუნდები მოედნიდან გაიყვანა. მიზეზი ამინდის გაუარესება იყო. ჭექა-ქუხილს ძლიერი წვიმა და სეტყვა მოჰყვა. თამაში 15 წუთში განახლდა.
- კაი ჰავერცს კარიერაში 20 თერთმეტმეტრიანი აქვს დარტყმული, საიდანაც მეცხრამეტე დანიასთან გაიტანა.
- ჯამალ მუსიალამ ევროპის ჩემპიონატზე მესამე გოლი გაიტანა და ბომბარდირთა დავაში გიორგი მიქაუტაძეს დაეწია.
გერმანიის ნაკრებმა პირველივე წუთებიდან აქტიურად შეუტია. აქცენტი სწრაფ გოლზე გააკეთა, გაიტანა კიდეც ნიკო შლოტერბეკმა, თუმცა მსაჯმა მეკარეზე წესების დარღვევა დააფიქსირა და გოლი არ ჩაითვალა. დანიამ თამაში მალევე გამოასწორა და მშვიდი პირველი ტაიმი თამაშის 15 წუთით შეწყვეტამ კიდევ უფრო დაამშვიდა.
მეორე ტაიმში უკვე დანიას არ ჩაუთვალეს გოლი – იოახიმ ანდერსენი თამაშგარე მდგომარეობაში იყო. აქედან ორ წუთში მსაჯი კიდევ ერთხელ მივიდა ვიდეოგამეორების სანახავად – მოედანზე დაბრუნებულმა თითი თერთმეტმეტრიანის ნიშნულისკენ გაიშვირა. ბურთი დანიელ მცველს საჯარიმოში ხელზე მოხვდა. პენალტის დარტყმა ჰავერცმა ითავა და მეკარისგან დაბალ, მარცხენა კუთხეში ზუსტად დაარტყა.
გოლის შემდეგ თამაში კიდევ უფრო გაიხსნა. გერმანიის ნაკრებს ორი ასპროცენტიანი მომენტი შეექმნა, თუმცა ჯერ ჰავერცმა ვერ ისარგებლა შანსით, შემდეგ – მუსიალამ. ამ უკანასკნელმა თავისი მაინც გაიტანა – 68-ე წუთზე ზუსტი დარტყმით აიღო დანიის ნაკრების კარი. ამის შემდეგ იყო არაერთი სახიფათო მომენტი, მაგრამ გოლი აღარ გასულა.
გერმანიის ნაკრები შვეიცარიის შემდეგ მეორე მეოთხედფინალისტია, სადაც მისი მეტოქე საქართველოსა და ესპანეთს შორის
გამარჯვებული იქნება.
1tv.ge
