თბილისის საქალაქო სასამართლოში საბიუჯეტო თანხების გაფლანგვის საქმეზე მიმდინარე მიხეილ სააკაშვილის სასამართლო პროცესიდან პარტია „კანონი და სამართლის" ხელმძღვანელი თაკო ჩარკვიანი მანდატურებმა გაიყვანეს.
სასამართლო სხდომაზე სიტყვით გამოსვლისას, მიხეილ სააკაშვილმა პროკურორებს მოღალატეები უწოდა, რასაც მოსამართლე გამოეხმაურა. „სამშობლოს მოღალატე უწოდო საჯარო მოხელეს, ეს მძიმე მოსასმენია", - აღნიშნა მოსამართლე ბადრი კოჭლამაზაშვილმა.
ამის შემდეგ სასამართლო დარბაზში მყოფმა თაკო ჩარკვიანმა აღნიშნა, რომ „სირცხვილია, როცა კორუფციონერები ასამართლებენ მესამე პრეზიდენტს". მან სასამართლოს დღევანდელ პროცესს სამარცხვინო უწოდა.
მოსამართლემ მას სიმშვიდისკენ მოუწოდა, რის შემდგაც თაკო ჩარკვიანი მანდატურებმა სასამართლო დარბაზიდან გაიყვანეს.
