შესაძლოა, ცეცხლის შეწყვეტის შემდეგ საფრანგეთმა უკრაინაში რამდენიმე ათასი ჯარისკაცი გაგზავნოს, - ამის შესახებ საფრანგეთის პრეზიდენტმა, ემანუელ მაკრონმა პარიზში, „მსურველთა კოალიციის“ შეხვედრის დასრულების შემდეგ France 2-თან ინტერვიუში განაცხადა.
საფრანგეთის პრეზიდენტის თქმით, ფრანგი ჯარისკაცები ცეცხლის შეწყვეტის შეთანხმების მიღწევის შემდეგ რუსეთ-უკრაინის საზღვრის კონტროლის ოპერაციებში მიიღებენ მონაწილეობას, რათა შესაძლო დარღვევები დააფიქსირონ.
„მრავალეროვნულ ძალებში ჩვენი მონაწილეობის შესახებ მზადყოფნა გამოვხატეთ. მსურს, ჩვენს მოქალაქეებს ვუთხრა, რომ ეს ძალები საბრძოლო მოქმედებებში მონაწილეობას არ მიიღებენ“, - განაცხადა მაკრონმა.
ამასთან, იტალიის მთავრობის ცნობით, ქვეყანა უკრაინაში უსაფრთხოების გარანტიების ფარგლებში ჯარებს არ გაგზავნის.
„პრემიერ-მინისტრმა, ჯორჯია მელონიმ უკრაინის მხარდაჭერა დაადასტურა და გარანტიების საკითხზე კიდევ ერთხელ გაიმეორა მთავრობის პოზიცია, რომელიც იტალიის ჯარების ადგილზე განთავსების გამორიცხვას გულისხმობს“, - ნათქვამია იტალიის მთავრობის განცხადებაში.
