„ქართული ოცნების“ დამფუძნებლის, ბიძინა ივანიშვილი მეუღლე, ეკატერინე ხვედელიძე, მოკლული მასწავლებლის, გიგა ავალიანის დედის, ეკა კუპატაძის მიმართვას გამოეხმაურა.
ეკატერინე ხვედელიძე გამოქვეყნებულ განცხადებაში ოჯახს სამძიმარს უცხადებს და აცხადებს, რომ მომხდართან დაკავშირებით ყველა კითხვას გამოძიებამ უნდა გასცეს პასუხი.
„ქალბატონო ეკა, მთელი გულით თანაგიგრძნობთ და ვიზიარებ თქვენს უმძიმეს ტრაგედიას. ვიცი, რომ არ არსებობს სიტყვა, რომელიც დედას შვილის დაკარგვის ტკივილს შეუმსუბუქებს, თუმცა მინდა იცოდეთ, რომ ამ მწუხარებაში მარტო არ ხართ და ამ ქვეყანაში მცხოვრები ყველა ქართველი დედა თქვენი ჭირისუფალია“, – ნათქვამია მიმართვაში.
მისივე განცხადებით, არსებული ინფორმაციით, გამოძიება ჯერ არ დასრულებულა და იგი დარწმუნებულია, რომ შესაბამისი სახელმწიფო უწყებები საქმეს სრულყოფილად გამოიძიებენ.
„როგორც ჩემთვის ცნობილია, გამოძიება ჯერ არ დასრულებულა. დარწმუნებული ვარ, შესაბამისი სახელმწიფო უწყებები საქმეს სრულყოფილად გამოიძიებენ და ყველა გარემოება სრულად იქნება შესწავლილი, რათა თქვენს თავს დატრიალებული უმძიმესი ტრაგედიის არცერთი კითხვა არ დარჩეს პასუხგაუცემელი. როგორც დედა-დედას, როგორც ქალი-ქალს, გისურვებთ სულიერ სიმტკიცეს, ძალას და სიმშვიდეს“, – აღნიშნულია ეკატერინე ხვედელიძის განცხადებაში.
ცნობისთვის, გიგა ავალიანის დედამ, ეკა კუპატაძემ, ერთი დღით ადრე ბიძინა ივანიშვილის სახლთან გამართულ მიმართვაში ეკატერინე ხვედელიძეს მოუწოდა, „როგორც დედა გამწარებულ დედას“, მის გვერდით დამდგარიყო.
