შინაგან საქმეთა სამინისტროს ინფორმაციით, აჭარის ტელევიზიის თანამშრომლის, კობა ფარტენაძის მიმართ განხორციელებული ძალადობისა და მუქარის ფაქტზე ორი პირი დააკავეს.
უწყების ცნობით, გამოძიებით დადგინდა, რომ ერთ-ერთმა დაკავებულმა 9 აგვისტოს, ბათუმში, ურთიერთშელაპარაკების დროს კობა ფარტენაძეს ფიზიკური შეურაცხყოფა მიაყენა, ხოლო მოგვიანებით მეორე დაკავებული მას დანით დაჭრით დაემუქრა.
„შინაგან საქმეთა სამინისტროს აჭარის პოლიციის დეპარტამენტის ბათუმის საქალაქო სამმართველოს თანამშრომლებმა ბათუმში მომხდარ ძალადობისა და მუქარის ფაქტებზე 2 პირი დააკავეს.
გამოძიებით დადგინდა, რომ ერთ-ერთმა დაკავებულმა, რომელსაც ძალადობა ედება ბრალად, მიმდინარე წლის 9 აგვისტოს, ურთიერთშელაპარაკებისას, ბათუმში ერთ პირს ფიზიკური შეურაცხყოფა მიაყენა. მომხდარიდან მალევე, მას ბრალდებულის სახით დაკავებული კიდევ ერთი პირი დანის გამოყენებით დაჭრით დაემუქრა.
სამართალდამცველებმა ცხელ კვალზე ჩატარებული ოპერატიული ღონისძიებებისა და საგამოძიებო მოქმედებების შედეგად, ორივე მამაკაცი ბრალდებულის სახით დააკავეს.
გამოძიება საქართველოს სისხლის სამართლის კოდექსის 126-ე (ძალადობა) და 151-ე (მუქარა) მუხლებით მიმდინარეობს“, – აცხადებენ შინაგან საქმეთა სამინისტროში.
