პროკურატურამ ნატა ვიბლიანი ოფიციალურად დაზარალებულად ცნო. ამის შესახებ ინფორმაცია სოციალურ ქსელში მისმა ადვოკატმა, ტარიელ კაკაბაძემ გაავრცელა.
„ნატა ვიბლიანი პროკურატურამ ოფიციალურად ცნო დაზარალებულად“, – წერს კაკაბაძე.
ნატა ვიბლიანის საქმეზე გამოძიება საქართველოს სისხლის სამართლის კოდექსის 137-ე მუხლით მიმდინარეობს, რაც გაუპატიურებას გულისხმობს. საქმეს შინაგან საქმეთა სამინისტროს სამეგრელო-ზემო სვანეთის პოლიციის დეპარტამენტი იძიებს.
გამოძიება დაახლოებით ერთი თვის წინ, სოციალურ ქსელში გავრცელებული ვიდეომიმართვების საფუძველზე დაიწყო.
ნატა ვიბლიანი აცხადებს, რომ 1990-იან წლებში, რამდენიმე წლის განმავლობაში, მას სისტემატურად აუპატიურებდა მისი თანასოფლელი, სრულწლოვანი მამაკაცი. გარდა ამისა, ის გაუპატიურებაში ბრალს კიდევ სამ თანასოფლელს სდებს.
საქმეზე საგამოძიებო მოქმედებები გრძელდება.
