ისრაელის პრემიერ-მინისტრ ბენიამინ ნეთანიაჰუს განცხადებით, ისრაელი მზად არის, დაასრულოს ირანის წინააღმდეგ დაწყებული მისია, რომლის ერთ-ერთ მთავარ მიზნად ის ირანის რეჟიმის დამხობას ასახელებს.
„მიღწევები უზარმაზარია, მაგრამ ჯერ კიდევ არის ბევრი რამ, რაც უნდა დავასრულოთ. პირველ რიგში, ვგულისხმობ რეჟიმის დამხობას. მისი დასასრული ახლოვდება“, — განაცხადა ნეთანიაჰუმ.
ისრაელის პრემიერის თქმით, ისრაელმა შეერთებულ შტატებთან ერთად ირანის წინააღმდეგ მნიშვნელოვან შედეგებს მიაღწია და ქვეყნისთვის არსებული „ეგზისტენციალური საფრთხე“ შეამცირა.
„ჩვენ თავიდან ავიცილეთ ატომური ბომბებისა და ბალისტიკური რაკეტების საფრთხე და უდიდესი ძალით დავარტყით ირანულ ღერძს“, — აღნიშნა მან.
ნეთანიაჰუმ ირანიც გააფრთხილა, რომ ისრაელზე ახალი თავდასხმის შემთხვევაში პასუხი უკიდურესად მძიმე იქნება.
„ჩვენ მზად ვართ, დავიცვათ თავი და მზად ვართ, დავარტყათ ჩვენს მტრებს. მივმართავ ჩვენს მტრებს: ჩვენთან თამაში არ ღირს“, — განაცხადა ნეთანიაჰუმ.
მისი შეფასებით, ისრაელი დღეს „უფრო ძლიერია, ვიდრე ოდესმე“, მისი მოწინააღმდეგეები კი მნიშვნელოვნად დასუსტდნენ. ნეთანიაჰუმ ისრაელს ახლო აღმოსავლეთის ყველაზე ძლიერ სახელმწიფოდაც მოიხსენია და აღნიშნა, რომ ირანის წინააღმდეგ ოპერაციის ფარგლებში დასახული მიზნების სრულად მისაღწევად ბრძოლა ჯერ დასრულებული არ არის.
