მეოთხედფინალთან ახლოს - საქართველოს ახალგაზრდულმა ნაკრებმა ევრო 2023-ზე ბელგიასთან მატჩი ფრედ დაასრულა
25.06.2023 ნახვები: 780
ევროპის 21-წლამდე ჩემპიონატის ჯგუფური ეტაპის მეორე ტურში საქართველოს ახალგაზრდული ნაკრები „დინამო არენაზე“ ბელგიას დაუპირისპირდა. მატჩი ფრედ – 2:2 დასრულდა.
ამ მატჩში ევროპის ახალგაზრდულ ჩემპიონატებზე დასწრების რეკორდი გაუმჯობესდა, თამაშს 41 881-მა მაყურებელმა მიადევნა თვალი „დინამო არენაზე“. ქართველებისთვის შეხვედრის პირველი ტაიმი არასასიამოვნო სცენარით წარიმართა. ბელგიელებმა თამაში აქტიურად დაიწყეს და შექმნილი არაერთი მომენტიდან ორით ისარგებლეს.
მე-15 წუთზე ასტერ ვრანცკის პასით კარის წინ მარტო დარჩენილმა მაქსიმ დე კუიპერმა ბელგია დააწინაურა. 38-ე წუთზე კი დე კუიპერის გადაცემით ლარჟი რამაზანმა გაიტანა.
მეორე ტაიმის დასაწყისში რამაზ სვანაძემ შეტევების გასაძლიერებლად და თამაშის გადასარჩენად მოედანზე პირველი მატჩის ერთ-ერთი გმირი – გიორგი წიტაიშვილი შეიყვანა, ასევე, ნიკა გაგნიძე და გიორგი გოჩოლეიშვილი. ამან შედეგი გამოიღო, 52-ე წუთზე სხვაობა საჯარიმოს ახლოდან ძლიერი დარტყმით წიტაიშვილმა შეამცირა.
64-ე წუთზე ქართველების შეტევა ზურიკო დავითაშვილმა განავითარა და მეკარესთან პირისპირ აზაროვი დატოვა, მაგრამ მან შესანიშნავი მომენტით ვერ ისარგებლა.
87-ე წუთზე სვანაძის გუნდის შეტევამ შედეგი გამოიღო – აზაროვის ზუსტი ჩაწოდების შემდეგ კარის წინ მარტო დარჩენილმა გულიაშვილმა წონასწორობა აღადგინა და მატჩში საბოლოო ანგარიში დააფიქსირა.
საქართველოს ნაკრები ჯგუფური ეტაპის მესამე მატჩს 27 ივნისს, ნიდერლანდებთან გამართავს. ორი ტურის შემდეგ ჩვენი გუნდი 4 ქულით პირველ ადგილზეა. მეორე ადგილს 2-2 ქულით ბელგია და ნიდერლანდები იყოფენ, ხოლო პორტუგალია 1 ქულით ბოლო პოზიციაზეა. რამაზ სვანაძის გუნდს მომდევნო ეტაპზე, მეოთხედფინალში გასასვლელად უკანასკნელ შეხვედრაში ფრეც აძლევს ხელს.
საქართველო – ბელგია 2:2
გოლები: დე კუიპერი (15. ვრანცკის პასით), რამაზანი (38. დე კუიპერის პასით), წიტაიშვილი (52. გოჩოლეიშვილის პასით), გულიაშვილი (87. აზაროვის პასით)
საქართველო U21: გიორგი მამარდაშვილი, საბა ხვადაგიანი (48. გიორგი გოჩოლეიშვილი), ალექსანდრე კალანდაძე, ივა გელაშვილი (81. ნოდარ ლომინაძე), საბა საზონოვი, ზურიკო დავითაშვილი, ანზორ მექვაბიშვილი, ლუკა გაგნიძე (47. ნიკა გაგნიძე (75. გიორგი გულიაშვილი)), ირაკლი აზაროვი, გიორგი მოისწრაფიშვილი (47. გიორგი წიტაიშვილი), გიორგი გაგუა.
ბელგია U21: მაარტენ ვანდევოორდტი, უგო სიკე (81. ვან დერ ბრემტი), ზენო დებასტი (79. ამენ ალ დახილი), კონი დე ვინტერი, მაქსიმ დე კუიპერი, შარლე დე კეტელარე, მანდელა კეიტა, ასტერ ვრანცკი, მიკელ-ანჟე ბალიკვიშა, ლუის ოპენდა,
ლარჟი რამაზანი (71. ნიკოლას რასკინი).
