დღეს, 1-ელ მარტს, ქობულეთის მუზეუმში, ახალგაზრდა პოეტის ზურაბ (ზუკა) ნემსაძის შემოქმედებითი საღამო გაიმართება.
ზურაბ ნემსაძე მსმენელს გააცნობს მის ახალ და წლების განმავლობაში ნაცნობ ლექსებს.
„უსაზღვროდ ბედნიერი ვარ. დიდი ხანია სცენაზე არ ვმდგარვარ და ძალიან ვღელავ“, - ამბობს ახალგაზრდა პოეტი, რომელმაც ლექსების წერა 6 წლის ასაკში დაიწყო და უკვე ათზე მეტი შემოქმედებითი საღამო აქვს ჩატარებული.
პოეტის თქმით, უდიდესი პასუხისმგებლობაა განსაკუთრებით მისი საყვარელი ქობულეთისა და აჭარელი მსმენელის წინაშე წარსდგომა.
„ალბათ სიმბოლურია, რომ საღამო გაზაფხულის პირველ დღეს იმართება. ეს ახალ შემართებასა და ენრეგიას მძენს. საღამოში ჩემთან ერთად მონაწილეობას მიიღებენ სტუდია „შარავანდის“ წევრები. წარმოდგენილი იქნება რამდენიმე პერფორმანსი, მათ შორის შოვის ტრაგედიაზე, სიყვარულზე. ვფიქრობ საღამო საინტერესო გამოვა“, - აცხადებს ზურაბ ნემსაძე.
ზურაბ ნემსაძე არის ჟურნალისტი, სხვადასხვა პუბლიკაციების ავტორი. წერს მედიის, ხელოვნებისა და პოლიტიკის საკითხებზე. ლექსების წერა 6 წლის ასაკში დაიწყო. მისი ინიციატივით მოეწყო ქობულეთში ცნობილი ბიბლიოფილის მამა ხარაზის პირველი მემორიალური საღამო, რაც კრიტიკოსების მიერ შეფასდა, როგორც "მამია ხარაზის დაბადების ხელახალი ფაქტი". მის საქმიანობაში განსაკუთრებული ადგილი უკავია აჭარის, აჭარელი პოეტებისა და ხელოვანების პოპულარიზაციას.
წლების განმავლობაში, ზურაბ ნემსაძის ინიციატივით შეგროვდა და ქობულეთის საგანმანათლებლო დაწებულებებს 3 ათასზე მეტი წიგნი გადაეცა.
პოეტის შემოქმედებითი საღამო, ქობულეთის მუნიციპალიტეტის მერიისა და მუზეუმის მხარდაჭერით იმართება.
