მამუკა ხაზარაძე - არვინ შედრკეთ, არავის შეგეშინდეთ, ბრძოლა გაგრძელდება იქამდე, ვიდრე ქვეყანას არ დავიხსნით მავნებლებისა და კრიმინალებისგან

მინდა, ყველას კიდევ ერთხელ ვუთხრა, არვინ შედრკეთ, არავის შეგეშინდეთ, ეს ბრძოლა გაგრძელდება მანამ, სანამ ამ ქვეყანას არ დავიხსნით ამ მავნებლებისგან, კრიმინალებისგან, უსამართლო ადამიანებისგან, რომლებმაც გაყიდეს ქვეყანა, ჩაატარეს საკონსტიტუციო გადატრიალება,- ამის შესახებ კოალიცია “ძლიერი საქართველოს” ლიდერმა, მამუკა ხაზარაძემ ჟურნალისტებს სასამართლოში განუცხადა, როდესაც ისაუბრა კოალიციის კიდევ ერთი ლიდერის, ალეკო ელისაშვილისთვის პატიმრობის შეფარდებაზე.

ხაზარაძის თქმით, ელისაშვილის პატიმრობაში დატოვება ნიშნავს იმას, რომ ქვეყანაში სამართალი არ არსებობს.

“ბიძინა ივანიშვილის სასამართლოში მიდის ადამიანების სპეცოპერაცია, განსაკუთრებით პოლიტიკოსების,აქტივისტების, გულანთებული ქართველების დაშინების კამპანია. 300-ზე მეტი ახალგაზრდაა დაპატიმრებული და 85% არის დასახიჩრებული, ეს არის ძალიან შემაშფოთებელი რამ, ეს არის დანაშაული, რომელსაც პირდაპირ ატარებს ბიძინა ივანიშვილი. ალეკო ელისაშვილის დღევანდელი დაპატიმრება კიდევ ერთი ნათელი დასტურია იმისა, რომ ჩვენ ამ ქვეყანაში არც სასამართლო გვაქვს, არც სამართალი. ეს ხალხი ემსახურება ერთ ადამიანს და ეს ერთი ადამიანი, ბიძინა ივანიშვილი ემსახურება კრემლს. დღეს, ბრძოლა მიდის არა რაღაც სასამართლო დარბაზებში, არამედ მიდის ყველგან, ეს არის ქუჩა, დაწესებულება, შემოქმედებითი საზოგადოება, რეგიონები.რასთან გვაქვს საქმე? - საქმე გვაქვს იმასთან, რომ ბიძინა ივანიშვილის რუსულ ხელისუფლებას საქართველოს შეთრევა უნდა რუსეთში და ჩვენ, ყველა ამას ვეწინააღმდეგებით. ეს წინააღმდეგობა გაგრძელდება. მინდა, ყველას კიდევ ერთხელ ვუთხრა, არვინ არ შედრკეთ, არავის შეგეშინდეთ, ეს ბრძოლა გაგრძელდება მანამ, სანამ ამ ქვეყანას არ დავიხსნით ამ მავნებლებისგან, ამ კრიმინალებისგან, ამ უსამართლო ადამიანებისგან, რომლებმაც გაყიდეს ქვეყანა, ჩაატარეს საკონსტიტუციო გადატრიალება და დოკუმენტურად აფორმებენ საქართველოს რუსეთზე. ამას არ დავუშვებთ. ყველა დროის ყველაზე დიდებული ბრძოლა არის სამშობლოსთვის ბრძოლა, მისი თავისუფლებისთვის, დამოუკიდებლობისთვის ბრძოლა და ჩვენ ახლა ვართ ამ ბრძოლაში. ვინც ამ ბრძოლაშია, ყველას ჩემგან დიდი პატივისცემა, იმიტომ, რომ ეს ამბავი დგება 100 წელიწადში ერთხელ. მოგვივიდა ჩვენ 100 წლის მერე ეს ამბავი, ცივილურმა სამყარომ გაგვიღო კარები და ამ სასამართლოში ადამიანები, ამ უზარმაზარ ძალისხმევას უპირისპირებენ უსამართლობას, უკანონო გადაწყვეტილებას და დაშინებას. არ გამოვა ეს ამბავი, ეს ქვეყანა გაიმარჯვებს და ბიძინა ივანიშვილი თავის ამ

ბანდასთან ერთად წავა აქედან, ნამდვილად! ", - განაცხადა ხაზარაძემ.