მინდა, მჯეროდეს, რომ ევროკავშირში საქართველოსთან დაკავშირებული საკითხი დადებითად გადაწყდება, რადგან ეს არ არის ტექნიკური რეფორმების საკითხი, საუბარი არ არის წევრობაზე, ვსაუბრობთ იმაზე, პოლიტიკური გადაწყვეტილება იქნება თუ არა მიღებული, რომ ჩვენ ოფიციალურად ამ გზას დავადგეთ, – ამის შესახებ საქართველოს პირველ არხს, „გირჩის“ წევრმა, სანდრო რაქვიაშვილმა განუცხადა.
მისი თქმით, ევროკავშირის მხრიდან პოლიტიკური გადაწყვეტილება უნდა იყოს მიღებული.
„თუ ეს არ იქნება მიღებული, დიდი შეცდომა იქნება დაშვებული ევროკავშირის მხრიდან, მათ შორის საერთაშორისო ურთიერთობების საკითხია და არა ჩვენი შიდა რეფორმების. ძალიან გაგვიჭირდება რომ განსხვავებული პოზიცია იყოს, შესაბამისად, არ მინდა, დავუშვა, რომ სხვა გადაწყვეტილებას მიიღებენ, თუ ასე იქნება, დაველოდოთ არგუმენტაციას. ეს არის პოლიტიკური გადაწყვეტილება, რომელიც ერთი მხრივ, გვეუბნება, რომ ჩვენ შანსი გვაქვს ევროპის წევრი ქვეყანა გავხდეთ და მეორე მხრივ, რუსეთისთვის ცხადი იქნება, რომ საქართველო არ არის მისი კოლონია ან ინტერესთა სფერო. იმედია, ასეთ ნაბიჯებს გადადგამენ, რადგან ევროკავშირს არანაირი ვალდებულება არ უჩნდება და პირიქით, საქართველოს მხარეს იქნება მთელი პრობლემა და რეფორმების ჩატარება მოგვიწევს, რომ ევროკავშირში გავწევრიანდეთ“, – განაცხადა რაქვიაშვილმა.
