„ლელო – ძლიერი საქართველოს“ ლიდერის, ბადრი ჯაფარიძის განცხადებით, თუ საკონსტიტუციო სასამართლო პოლიტიკური პარტიების აკრძალვის შესახებ „ქართული ოცნების“ სარჩელს დააკმაყოფილებს, ეს გამოუსწორებელ ზიანს მიაყენებს საქართველოს სახელმწიფოსა და მის თითოეულ მოქალაქეს.
ამის შესახებ ჯაფარიძემ „ძლიერი საქართველო – ლელოს“ ლიდერებისა და საექსპერტო წრეების წარმომადგენლების შეხვედრის შემდეგ განაცხადა, რომელზეც პარტიების აკრძალვის საკითხი განიხილეს.
მისი შეფასებით, საკონსტიტუციო სასამართლოში მიმდინარე პროცესი მხოლოდ კონკრეტული პოლიტიკური პარტიების წინააღმდეგ არ არის მიმართული და საფრთხეს უქმნის საქართველოს ევროპულ მომავალსა და სუვერენიტეტს.
„ეს პროცესი არ არის მხოლოდ პარტიების გაუქმების წინააღმდეგ მიმართული პროცესი, დასავლური, თავისუფალი სამყაროს წინააღმდეგ მიმართული პროცესია, ასევე იმ პარტიების მიმართ, რომლებსაც უნდათ, საქართველო ნახონ ევროპულ ოჯახში“, – განაცხადა ჯაფარიძემ.
მისივე თქმით, შეხვედრის მონაწილეებს შორის სრული თანხვედრაა იმასთან დაკავშირებით, რომ საკონსტიტუციო სასამართლოში მიმდინარე პროცესი ქვეყნის ევროპული ინტეგრაციის მხარდამჭერი საზოგადოების წინააღმდეგ არის მიმართული.
„იმას თუ გააფორმებს საკონსტიტუციო სასამართლო, რაც სურს „ქართულ ოცნებას“, ჩვენი სახელმწიფო და თითოეული ჩვენი მოქალაქე მიიღებს გამოუსწორებელ ზიანს!“ – აღნიშნა ჯაფარიძემ.
მისი განცხადებით, „ქართული ოცნების“ მიერ წარდგენილ სარჩელს სამართლებრივი საფუძველი არ აქვს.
„სარჩელს, რომელიც „ქართულმა ოცნებამ“ შეიტანა, სამართალთან არანაირი კავშირი არ აქვს. ამიტომ ჩვენი ამოცანა ახლა არის ის, რომ ყველამ ერთად შევეცადოთ, არ დავუშვათ ჩვენი ქვეყნისთვის, ჩვენი სახელმწიფოსთვის, ჩვენი დამოუკიდებლობისთვის, თითოეული ჩვენი მოქალაქისთვის გამოუსწორებელი შედეგების დადგომა“, – განაცხადა ბადრი ჯაფარიძემ.
