პარლამენტის წევრმა, ხათუნა სამნიძემ პარლამენტის პლენარულ სხდომაზე დეპუტატებს მიმართა და მოუწოდა, სიძულვილის ენით საუბრის ნაცვლად, პარლამენტმა ევროკავშირის 12 რეკომენდაციის შესრულება დაიწყოს.
სამნიძის თქმით, თავდასხმები მათზე, ვისაც განსხვავებული აზრი აქვს, მმართველი გუნდის მიერ წახალისებული პრაქტიკაა.
„დღეს რომ სიძულვილი და ზიზღია მთავარი მამოძრავებელი ძალა ქართული პოლიტიკის, ამაზე პასუხისმგებელია „ქართული ოცნება“. თუ თქვენ გსურთ, რომ დასრულდეს ეს პოლარიზაცია, თქვენგან არ უნდა ისმოდეს და, მათ შორის, ამ ტრიბუნიდან უმრავლესობის ლიდერისგან და პარტიის თავმჯდომარისგან, რომ ვიღაც ქვეყნის მტერია და ებრძვის ამ ქვეყნის ტრადიციებს. თქვენ ახალისებთ ყველა იმ ადამიანს, ვისაც სხვისი განსხვავებული აზრი არ მოსწონს და შეურაცხყოფა, თავდასხმები მათზე, ვისაც განსხვავებული აზრი აქვს, ეს არის თქვენ მიერ წახალისებული პრაქტიკა.
რაც შეეხება იმაზე საუბარს, რომ კანადა და სხვა ქვეყნები აპირებენ იმ კანონის მიღებას, თქვენ აქ რა კანონიც დააინიცირეთ, იყო რუსული პრაქტიკა და მთლიანად რუსული გეგმა. რაც შეეხება სხვა ქვეყნებს, სხვა ქვეყნები ლაპარაკობენ მათ მიმართ მტრულად განწყობილ ქვეყნებზე და გარდა ამისა, წლებია, მსჯელობენ ამ საკითხზე. თქვენ კიდევ განხილვის დროს ადამიანები არ შემოუშვით კომიტეტზე, რომლებსაც პირდაპირ ეხებოდათ ეს კანონი და ჰქონდათ მასზე მოსაზრებები. თუ გვინდა, რომ დასრულდეს „მოღალატეების“ ძახილი, შეწყვიტეთ ამ კანონის უკან წაღების შემდეგ ისევ ამ კანონზე საუბარი და გადავიდეთ ამ ქვეყნის მთავარ პრიორიტეტზე, რაც არის ევროკავშირის რეკომენდაციების 12 პუნქტის შესრულება“, – განაცხადა ხათუნა სამნიძემ.
