გერმანიის მეკლენბურგ-წინა პომერანიის მხარის საპარლამენტო არჩევნებში პარტიამ „ალტერნატივა გერმანიისთვის“ (AfD) ხმების ყველაზე დიდი წილი მიიღო. Deutsche Welle-ს ინფორმაციით, საარჩევნო კომისიის მიერ გამოქვეყნებული წინასწარი შედეგებით, AfD-ს ამომრჩეველთა 38,2%-მა დაუჭირა მხარი, ხოლო „სოციალ-დემოკრატიულმა პარტიამ“ (SPD), რომელსაც მხარის პრემიერ-მინისტრი მანუელა შვეზიგი ხელმძღვანელობს, 35,5% მიიღო.
წინასწარი მონაცემებით, მხარის პარლამენტში კიდევ ორი პარტია მოხვდა: „მემარცხენე პარტია“ ხმების 6,5%-ით და „მწვანეთა პარტია“ — 5,7%-ით. გერმანიის კანცლერ ფრიდრიხ მერცის „ქრისტიან-დემოკრატიულმა კავშირმა“ (CDU) ხმების 4,9% მიიღო და საპარლამენტო ბარიერი ვერ გადალახა.
მანდატების წინასწარი განაწილებით, AfD-ს მხარის პარლამენტში 32 ადგილი ერგება, SPD-ს — 29, ხოლო „მემარცხენე პარტიასა“ და „მწვანეებს“ — ხუთ-ხუთი.
ამასთან, ბერლინში ჩატარებული არჩევნების წინასწარი შედეგებით, ხმების ყველაზე დიდი წილი „მემარცხენე პარტიამ“ მიიღო — 25,3%. CDU-ს 19% აქვს, AfD-ს — 16%, ხოლო SPD-ს — 12,1%.
Deutsche Welle-ს ცნობით, მიმდინარე წელს გერმანიის სხვა მხარეებშიც გაიმართა არჩევნები: მარტში ბადენ-ვიურტემბერგში პირველი ადგილი „მწვანეთა პარტიამ“ დაიკავა, რაინლანდ-პფალცში — CDU-მ, ხოლო 6 სექტემბერს საქსონია-ანჰალტში — AfD-მ.
მეკლენბურგ-წინა პომერანიასა და ბერლინში გამოქვეყნებული მონაცემები წინასწარია. არჩევნებში პირველი ადგილის დაკავება თავისთავად არ ნიშნავს, რომ პარტია მხარის მთავრობას ჩამოაყალიბებს — ეს საპარლამენტო უმრავლესობის ფორმირებაზეა დამოკიდებული.
