აშშ-ის პრეზიდენტი დონალდ ტრამპი აცხადებს, რომ უკრაინასთან ომის შედეგად რუსეთმა დიზელის საწვავის ინდუსტრიაზე კონტროლი დაკარგა. მისი თქმით, რუსეთის ნავთობგადამამუშავებელი ქარხნების მნიშვნელოვანი ნაწილი დაზიანებულია და, სულ მცირე, დროებით აღარ ფუნქციონირებს.
„რუსეთმა, სამწუხაროდ, უკრაინასთან ომის გამო, დიზელის საწვავის ინდუსტრიაზე კონტროლი დაკარგა. მათი დიზელის გადამამუშავებელი ქარხნების დიდი ნაწილი აფეთქებულია და, სულ მცირე, დროებით, მწყობრიდან არის გამოსული. უკრაინასთან ეს უაზრო და გაუთავებელი ომი უნდა დასრულდეს“, - წერს ტრამპი სოციალურ ქსელ Truth Social-ზე.
აშშ-ის პრეზიდენტი ომის შედეგად დაღუპულთა რაოდენობაზეც საუბრობს. მისი განცხადებით, ყოველთვიურად 25 000 ადამიანი იღუპება, რომელთა უმრავლესობა სამხედრო მოსამსახურეა.
„მთელი მსოფლიო იტანჯება, რადგან ყოველთვიურად 25 000 ადამიანი, უმეტესად კი სამხედროები, იღუპება. რა სამარცხვინოა!“ - აცხადებს ტრამპი.
ტრამპის განცხადებაში მოყვანილი მონაცემები რუსეთის საწვავის ინდუსტრიის მდგომარეობისა და ყოველთვიურად დაღუპულთა რაოდენობის შესახებ მისი შეფასებებია.
