ამის შესახებ ბიბილაშვილმა საკონსტიტუციო სასამართლოს სხდომაზე განაცხადა, სადაც პარლამენტის 88 წევრის სარჩელი განიხილება ხუთი ოპოზიციური პარტიის არაკონსტიტუციურად ცნობისა და აკრძალვის მოთხოვნით.
ბიბილაშვილის შეფასებით, საკონსტიტუციო სასამართლოს გამოყენება პოლიტიკური პარტიების აკრძალვისა და სხვა არაკონსტიტუციური მიზნების მისაღწევად სამართალწარმოების ბოროტად გამოყენების მძიმე ფორმაა.
„სარჩელის კიდევ უფრო მნიშვნელოვანი მიზანია, კონსტიტუციურ დონეზე დაადასტუროს ოკუპანტი სახელმწიფოს, რუსეთის ფედერაციის მტკიცება, რომ 2008 წელს მისი სამხედრო აგრესია იყო ლეგიტიმური, რადგან ამის საფუძველი შექმნა საქართველომ. მინდა ხაზი გავუსვა – არა რომელიმე პარტიამ, არამედ საქართველოს მაშინდელმა ხელისუფლებამ, შესაბამისად, თქვენმა და ჩემმა სამშობლომ, ჩვენმა სახელმწიფომ“, – განაცხადა ბიბილაშვილმა.
მისი თქმით, მიუხედავად იმისა, თუ როგორ განმარტავს მოსარჩელე მხარე საკუთარ მიზნებს, სარჩელის დაკმაყოფილებას კონკრეტული სამართლებრივი და პოლიტიკური შედეგი ექნება.
„შეიძლება იდავონ, რომ ეს არ არის მიზანი, მაგრამ ვერავინ იდავებს, რომ ამ სარჩელის დაკმაყოფილების შემთხვევაში, შედეგი იქნება ზუსტად ეს – რუსეთის ფედერაციის სამხედრო აგრესიის ლეგიტიმაცია საქართველოს საკონსტიტუციო სასამართლოს მიერ მიღებული გადაწყვეტილების დონეზე“, – აღნიშნა მან.
ბიბილაშვილმა ასევე განაცხადა, რომ მოსარჩელე მხარე ერთმანეთში ურევს პოლიტიკურ და სამართლებრივ პასუხისმგებლობას, არ განასხვავებს სახელმწიფოსა და პოლიტიკურ პარტიას და კონკრეტული თანამდებობის პირების გადაწყვეტილებებს მთლიანად პარტიებს აკისრებს.
„მოსარჩელე მხარე შეგნებულად ურევს ერთმანეთში პოლიტიკურ და სამართლებრივ პასუხისმგებლობას, ასევე, არ ასხვავებს სახელმწიფოსა და პარტიას და არ ავლებს მათ შორის არანაირ ზღვარს“, – განაცხადა ბიბილაშვილმა.
მისივე შეფასებით, „ქართული ოცნება“, ერთი მხრივ, წინა ხელისუფლების კონკრეტული წარმომადგენლების გადაწყვეტილებებზე პასუხისმგებლობას პოლიტიკურ პარტიებს აკისრებს, მეორე მხრივ კი საკუთარ პარტიას სახელმწიფოსთან აიგივებს და მისი პოლიტიკის წინააღმდეგ მიმართულ საქმიანობას ანტისახელმწიფოებრივად წარმოაჩენს.
შეგახსენებთ, საქართველოს საკონსტიტუციო სასამართლო განიხილავს „ქართული ოცნების“ სარჩელს, რომლითაც ხუთი ოპოზიციური პოლიტიკური გაერთიანების – „ერთიანობა – ნაციონალური მოძრაობის“, „კოალიცია ცვლილებისთვის – გვარამია, მელია, გირჩი, დროას“, „ძლიერი საქართველო – ლელო, ხალხისთვის, თავისუფლებისთვის!“-ის, „ფედერალისტური პარტიისა“ და „გახარია საქართველოსთვის“-ის აკრძალვაა მოთხოვნილი.
