ისრაელის საპარლამენტო არჩევნებში ხმების 90,9%-ის დათვლის შემდეგ პრემიერ-მინისტრ ბენიამინ ნეთანიაჰუს ბლოკი ლიდერობას ინარჩუნებს, თუმცა საპარლამენტო უმრავლესობის მოსაპოვებლად საჭირო მანდატების რაოდენობას ვერ აგროვებს. ინფორმაციას The Times of Israel ცენტრალური საარჩევნო კომისიის წინასწარ მონაცემებზე დაყრდნობით ავრცელებს.
განახლებული შედეგებით, ნეთანიაჰუს ბლოკი 120-ადგილიან ქნესეთში 53 მანდატს მოიპოვებს, ხოლო მისი მთავარი კონკურენტის, გადი აიზენკოტის ბლოკი – 48 მანდატს.
ამასთან, არაბული პოლიტიკური პარტიები, წინასწარი მონაცემებით, ჯამში 19 მანდატს მიიღებენ.
ისრაელის პარლამენტში უმრავლესობის მოსაპოვებლად 61 მანდატია საჭირო. შესაბამისად, ამ ეტაპზე ვერცერთი ძირითადი ბლოკი დამოუკიდებლად ვერ უზრუნველყოფს საპარლამენტო უმრავლესობას.
აღსანიშნავია, რომ ხმების 41,9%-ის დათვლის შემდეგ ნეთანიაჰუს ბლოკს 57 მანდატს უწინასწარმეტყველებდნენ, აიზენკოტის ბლოკს კი – 47-ს. განახლებული მონაცემებით, ნეთანიაჰუს ბლოკის საპროგნოზო მანდატების რაოდენობა ოთხით შემცირდა.
ხმების დათვლა გრძელდება. საბოლოო შედეგებამდე მანდატების განაწილება შესაძლოა კვლავ შეიცვალოს.
