საქართველოში აშშ-ის ელჩის კელი დეგნანის განცხადებებს, სადაც ის ბიძინა ივანიშვილთან შეხვედრას ადასტურებს და აღნიშნავს, რომ შეხვედრაზე "საქართველოს ჩართვაზე უკრაინის წინააღმდეგ რუსეთის ომში" საუბარი არ ყოფილა, "ქართული ოცნების" წევრი რატი იონათამიშვილი გამოეხმაურა.
მისი შეფასებით, გაუგებარია, რატომ სთხოვა კელი დეგნანმა პოლიტიკიდან გასულ ადამიანს შეხვედრა.
"გაუგებარია, რატომ სთხოვა ამერიკის ელჩმა პოლიტიკიდან გასულ ადამიანს შეხვედრა და რაზე ესაუბრა სამი საათის განმავლობაში. ამ შეხვედრის შესახებ ელჩმა კომენტარი მხოლოდ მაშინ გააკეთა, როდესაც ბიძინა ივანიშვილის განცხადება გამოქვეყნდა. მანამდე ორაზროვან განცხადებებს აკეთებდა. ასევე, როდესაც ომის ნარატივზე არის საუბარი, უკეთესი იქნებოდა, მაშინ, როდესაც პირდაპირ მოუწოდებენ ომში ჩართვაზე რადიკალური ოპოზიციის, მათ მიერ კონტროლირებადი მედიასაშუალებების წარმომადგენლები, საერთაშორისო ლობისტები, ასევე, უკრაინის ხელისუფლების წარმომადგენლები, რომ გაკეთებულიყო გამიჯვნა, ეს უფრო უკეთესი იქნებოდა და კითხვის ნიშნებსაც გააქრობდა. მაგრამ ამის პარალელურად, არათუ ამ განცხადებებს გაემიჯნა, არამედ არც იმას, როდესაც სანქციების შეხებასთან იყო დაკავშირებული საუბრები ან თუნდაც მოხალისეების გაგზავნასთან დაკავშირებით. როდესაც საუბრობს ბერ დროს ხარჯავენ გარკვეული პირები ბიძინა ივანიშვილის ქონებასთან დაკავშირებით, საზოგადოებამ კარგად იცის, რომ თუ ვინმე ხარჯავს დიდ დროს და ენერგიას, ეს არის რადიკალური ოპოზიციის და მათი მედიასაშუალებების წარმომადგენლები," - განაცხადა რატი იონათამიშვილმა.
ცნობისთვის, საქართველოში ამერიკის შეერთებული შტატების ელჩი კელი დეგნანი ყოფილ პრემიერ-მინისტრ ბიძინა ივანიშვილთან შეხვედრის შინაარსთან დაკავშირებულ საკითხზე პირველ განცხადებას "ინტერპრესნიუსთან" ინტერვიუში აკეთებს. ინტერვიუში კელი დეგნანი აღნიშნავს, რომ ბიძინა ივანიშვილთან შეხვედრაზე არ ყოფილა საუბარი "საქართველოს ჩართვაზე უკრაინის წინააღმდეგ რუსეთის ომში", ან შანტაჟზე ან მოქმედებაზე, რაც უკავშირდება ივანიშვილისთვის ფულის გადარიცხვის შეფერხებას.
