ბოლო ორი კვირის განმავლობაში რამდენიმე შეხვედრა გვქონდა მმართველი და ოპოზიციური პარტიების წარმომადგენლებთან. პარლამენტში განვიხილეთ რეფორმების პროცესი, კერძოდ, სასამართლო რეფორმა, საარჩევნო კოდექსის რეფორმა და ევროკომისიის 12 რეკომენდაციის სხვა ასპექტები, – ამის შესახებ საქართველოში ევროკავშირის ელჩის მოვალეობის შემსრულებელმა ჟულიენ კრამპსმა „სტრატეგია აღმაშენებლისა“ და ფრაქცია „რეფორმების ჯგუფის“ წევრებთან შეხვედრის შემდეგ განაცხადა.
მისი თქმით, ევროკავშირის დელეგაცია ჩაერთვება და თვალყურს მიადევნებს პროცესს პარლამენტში, გააგრძელებს მაღალ დონეზე შეხვედრებს ყველა მხარესთან, როგორც მმართველ პარტიასთან და ოპოზიციასთან, ასევე სამოქალაქო საზოგადოების წარმომადგენლებთან.
„ჩვენი გზავნილია, რომ პარლამენტში მუშაობისას, პროცესთან დაკავშირებით მოვუწოდებთ ინკლუზიურობისკენ, ოპოზიციურ პარტიებსა და სამოქალაქო საზოგადოებას ჩართულობისკენ და შინაარსობრივ მხარესთან დაკავშირებით, ჩვენ მივყვებით ასოცირების დღის წესრიგს, რომელიც ევროკავშირსა და საქართველოს შორის შეთანხმდა და ის ფორმალურად ორი დღის წინ დამტკიცდა. ამ დოკუმენტში რამდენიმე მნიშვნელოვანი პრიორიტეტია. ჩვენ ასევე მივყვებით ეუთო/ოდირისა და ვენეციის კომისიის წინა რეკომენდაციებს, რომელიც ჩვენთვის თანაბრად მნიშვნელოვანია. ჩვენ ასევე დავეყრდენით წინადადებებს ამ ორგანიზაციებიდან, ეუთო/ოდირისა და ვენეციის კომისიისგან, რათა უზრუნველგვეყო შემდგომი მხარდაჭერა და მათ შემოგვთავაზეს, გადაგვეხედა კანონპროექტის ამ ყველა მნიშვნელოვან ასპექტებზე და ჩვენ მოვუწოდებთ, გამოიყენონ ეს შესაძლებლობები.
ყველა ეს რეფორმა ძალიან მნიშვნელოვანია ჩვენთვის და იმ სამუშაოსთვის, რომელიც ევროკომისიის მიერ წარმოდგენილ პრიორიტეტებს წარმოადგენს. ევროკავშირის დელეგაცია ჩაერთვება და თვალყურს მიადევნებს პროცესს პარლამენტში, გავაგრძელებთ მაღალ დონეზე შეხვედრებს ყველა მხარესთან, მმართველ პარტიასთან, ოპოზიციასთან, სხვა მხარეებთან, როგორებიც არიან სამოქალაქო საზოგადოების წარმომადგენლები. ამ პროცესზე მეტ კომენტარს დღეს ვეღარ გავაკეთებ“, – განაცხადა ევროკავშირის ელჩის მოვალეობის შემსრულებელმა.
