დიდი ხანია, „ნაცმოძრაობამ“ და რადიკალურმა ოპოზიციამ ხალხს მოაბეზრეს თავი, ახლა უკვე საკუთარ მხარდამჭერებსაც აბეზრებენ თავს, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.
როგორც ირაკლი კობახიძემ აღნიშნა, პოზიციების გამაგრებისთვის ცდილობენ, რადიკალური მესიჯებით გამოვიდნენ.
„დიდი ხანია, „ნაცმოძრაობამ“ და რადიკალურმა ოპოზიციამ ხალხს მოაბეზრეს თავი, ახლა უკვე საკუთარ მხარდამჭერებსაც აბეზრებენ თავს. ეს არის დღევანდელი მოცემულობა, არაფრის რესურსი არ აქვთ, არაფრის თავი არ აქვთ. იმისთვის, რომ შიგნით რაღაცნაირად სცადონ პოზიციების გამაგრება, ცდილობენ, რადიკალური მესიჯებით გამოვიდნენ. ამის უკან მეტი არაფერი არ დგას, რიხი რომ არ აქვთ, მათ განცხადებებში ძალიან კარგად ჩანს. ეს არის დღევანდელი მოცემულობა. იმედია, ამას აკვირდებიან ჩვენი საერთაშორისო პარტნიორები, რაღაც სახელმწიფო უსაფრთხოების კანონში რომ შეგვაქვს ცვლილება, ხანდახან იმაზე აკეთებენ ხოლმე კომენტარებს. როცა „ნაცმოძრაობის“ ფორმალური თავმჯდომარე რევოლუციას აანონსებს, მე მგონი, ამაზეც უნდა გაკეთდეს ხანდახან მაინც კომენტარი, ყოველ შემთხვევში ჩვენი სურვილი ეს იქნებოდა. ვნახოთ, რამდენად გაკეთდება ისეთი კომენტარები ჩვენი საერთაშორისო პარტნიორების მხრიდან, რომელიც ხელს შეუწყობს პოლარიზაციის შემცირებას. მათი დუმილი ხელს შეუწყობს პოლარიზაციის გაღვივებას“, – განაცხადა კობახიძემ.
