„ევროპული საქართველოს“ ლიდერის, გიგა ბოკერიას განცხადებით, თბილისის მერი კახა კალაძე შეტევაზეა გადმოსული იმის ნაცვლად, რომ პოლიტიკური პასუხისმგებლობის თაობაზე გადაწყვეტილება სწრაფად მიეღო. ამის შესახებ ბოკერიამ ჟურნალისტებს განუცხადა, როდესაც უპასუხა დასმულ შეკითხვას ვაკის პარკში მომხდარ ტრაგედიასთან მიმართებით კახა კალაძის პასუხისმგებლობის აუცილებლობაზე.
„დღეს კიდევ ერთი დაგვირგვინება ვიხილეთ ამ ძალიან უტიფარი, საზოგადოებისთვის ძალიან შეურაცხმყოფელი დამოკიდებულების, რასაც ივანიშვილის რეჟიმის ეს წარმომადგენელი, კალაძე ამ ტრაგედიის ფონზე ავლენს.
იმის ნაცვლად რომ, რაც შეიძლება სწრაფად მიეღო გადაწყვეტილება პოლიტიკური პასუხისმგებლობის თაობაზე, შეტევაზეა გადმოსული, მათ შორის, იმ ფონზე, რაც გუშინ მოხდა, როცა ამ ტრაგედიაში მონაწილე ბავშვის პროპაგანდისთვის გამოყენების მცდელობა ჰქონდა. ეს ყველაფერი ივანიშვილის რეჟიმის სტანდარტებითაც კი ძალიან ამაზრზენად გამოიყურება, სამწუხაროდ.
აქედან გამომდინარე, რაც დრო გავა, ეს ამბავი მორალურად და პოლიტიკურად კიდევ უფრო დამძიმდება. ჩვენთვის, როგორც საქართველოს მოქალაქეებისთვის, ეს კიდევ ერთი მაგალითია იმის, თუ რას გვიქადის მთლიანად ივანიშვილი რეჟიმი, რომლის პროდუქტიც არის კალაძე და რატომ არის ჩვენთვის ეროვნული ამოცანა, რომ ამ გზით ეს ქვეყანა აღარ წავიდეს და ეს რეჟიმი ჩამოსცილდეს ხელისუფლებას“, - განაცხადა გიგა ბოკერიამ.
გიგა ბოკერია კალაძეზე: ამ ტრაგედიაში მონაწილე ბავშვის პროპაგანდისთვის გამოყენების მცდელობა ჰქონდა
ნახვები: 488
