„კრიმინალები, პოლიცია და შანტაჟი: ნიკოლოზი ჩუბინიძის ბრძოლა გადარჩენისთვის"

"ერთიანი ნაციონალური მოძრაობის" ლიდერმა ზვიად კუპრავამ დღეს საჯარო ფეისბუქ პოსტით განცხადება გააკეთა კიდევ ერთი მოქალაქის-ნიკოლოზი ჩუბინიძის პოლიტიკური დევნის შესახებ.

უცვლელად გთავაზობთ ზვიად კუპრავას ფეისბუქ სტატუსს:

"საქართველოში პოლიტიკური რეპრესიების მასშტაბი ყოველდღიურად იზრდება, მხოლოდ ხელწერაა იგივე ! „ქართული ოცნების" მმართველობის პირობებში სახელმწიფო სტრუქტურები - პოლიცია, პროკურატურა, სპეციალური საგამოძიებო სამსახური - ერთიან მექანიზმად გადაიქცნენ, რომლის მიზანი ოპოზიციურად განწყობილი მოქალაქეების დაშინება და გაჩუმებაა. კრიტიკოსებს ფიზიკურად უსწორდებიან, აშანტაჟებენ, აიძულებენ ცრუ ჩვენებების მიცემას საკუთარი კოლეგების წინააღმდეგ. ვინც უარს იტყვის - იმას ციხით ემუქრებიან. ვინც გაბედავს საჯაროდ ლაპარაკს - იმას ქუჩაში დახვდებიან. ეს არის რეალობა, რომელშიც დღეს საქართველოს მოქალაქეები ცხოვრობენ”

მას შემდეგ, რაც ჩვენი ჟურნალისტი პოლიტიკურ ლიდერს დეტალების დასაზუსტებლად დაუკავშირდა, კუპრავამ ჩვენთან საუბრისას განაცხადა, რომ, “ერთიანი ნაციონალური მოძრაობის” მხარდამჭერი ნიკოლოზ ჩუბინიძე სპეციალური საგამოძიებო სამსახურის სამიზნე გახდა მხოლოდ იმის გამო, რომ სარეკლამო კომპანია, რომელშიც ნიკოლოზი მუშაობს ოპოზიციურ პარტიებსა და არასამთავრობო ორგანიზაციებს სააგიტაციო მასალების დამზადებაში ეხმარებოდა.

"ეს არის კლასიკური შანტაჟის შემთხვევა" - განაცხადა კუპრავამ. "ადამიანს, რომელიც უბრალოდ თავის საქმეს აკეთებდა, აიძულებენ ცრუ ჩვენებები მისცეს საკუთარი კოლეგების წინააღმდეგ. ვინც უარს იტყვის - იმას ციხით ემუქრებიან. ეს არის "ქართული ოცნების" მიერ შექმნილი  დღევანდელი რეალობა, სადაც ოპოზიციურად განწყობილი ადამიანების არსებობაც კი უბრალოდ დანაშაულია, რომელიც ისჯება !.”

ჩვენი ჟურნალისტი ასევე დაუკავშირდა ნიკოლოზ ჩუბინიძეს, რომელმაც დაადასტურა კუპრავას მიერ გაჟღერებული ფაქტები და დეტალურად გვიამბო იმ სისტემატური ზეწოლის, ფიზიკური ძალადობისა და დაშინების შესახებ, რომელსაც ბოლო თვეების განმავლობაში განიცდიდა სახელმწიფო უწყებების და ხელისუფლებასთან დაახლოებული კრიმინალების მხრიდან :

"თბილისში დავიბადე და გავიზარდე. ბავშვობაში პოლიტიკა არ მაინტერესებდა უფრო მეტად კი ვერ ვიგებდი - ვხედავდი კრიმინალს, სიდუხჭირეს, უსამართლობას, მაგრამ ვერ ვხვდებოდი რატომ ხდებოდა ეს ყველაფერი. 2003 წლის “ვარდების რევოლუცია” და შემდგომი აღორძინების წლები ბავშვობის წლებში საკუთარი თვალით ვნახე. მხოლოდ მოგვიანებით გავაცნობიერე, რა კოლოსალური ცვლილებები განხორციელდა იმ პერიოდში.

2018 წლის იანვარში სარეკლამო კომპანია D J L-ში დავიწყე მუშაობა გაყიდვების მენეჯერად. სწორედ იმ პერიოდში დავინტერესდი პოლიტიკით - ვხედავდი, როგორ მძიმდებოდა ეკონომიკური ვითარება, როგორ არბევდა ხელისუფლება აქციებს, როგორ აკავებდნენ მოქალაქეებს უსაფუძვლოდ. 2018 წლის აპრილში "თეთრი ხმაურის" აქციას დავესწარი - პოლიციის ძალადობის წინააღმდეგ. სწორედ იმ დღეს გაღვივდა ჩემში პროტესტი.

2019 წლიდან კომპანიაში დავიწყეთ მუშაობა მსხვილ დაკვეთებზე - მათ შორის არასამთავრობო ორგანიზაციებისთვის. როცა "სირცხვილიამ" 2500 ბროშურა შეგვიკვეთა, სიმბოლურ ფასად დავუმზადეთ - თითო 10 თეთრად. ეს იყო ჩვენი წვლილი საერთო საქმეში. იმ დღიდან რეგულარულად ვეხმარებოდით აქტივისტებს და ოპოზიციურ პარტიებს. ვამაყობდი ამით და დღესაც ვამაყობ.

2021 წლის 1 ოქტომბერს მიხეილ სააკაშვილი დააკავეს. ამ ინფორმაციამ  მთელი ქვეყანა ააფეთქა. 20 ნოემბერს "ერთიანი ნაციონალური მოძრაობის"  და “სირცხვილიას” ქალაქ რუსთავის რეგიონალური ოფისის ხელმძღვანელმა მარიამ ირემაძემ დამირეკა - "FreeMisha"-ს მოძრაობისთვის 4.500 პლაკატი და ფლაერი სჭირდებოდათ. რასაკვირველია, მივიღე დაკვეთა. ვერც კი წარმოვიდგენდი, რომ ეს ყველაფერი ჩემი ცხოვრების ჯოჯოხეთად ქცევის დასაწყისი იქნებოდა.

პირველი პარტიის ჩაბარების შემდეგ, 2021 წლის 22 დეკემბერს, ოფისში "სტუმრები" მოვიდნენ. ერთ-ერთი მათგანი ავთანდილ ბილანიშვილი აღმოჩნდა - "კაწრო", ცნობილი კრიმინალი, რომელსაც ხელისუფლება ხელს აფარებდა. მან პირდაპირ მითხრა: "კარგად ვიცი, რომ იმ ნაცების ძუკნასთან თანამშრომლობ. ჯობია თავი დაანებო მათთან ურთიერთობას. არ გინდა პრობლემები."

როცა ავუხსენი, რომ კანონიერ საქმეს ვაკეთებდი, აგრესიული გახდა: "თუ არ შეეშვები იმ ნაბიჭვრებთან ურთიერთობას, ცუდად დაამთავრებ! იმდენს იზავ, რომ მაგ ფლაერებს ტ**ში გაგიკეთებთ!" გასვლისას კიდევ ერთხელ დამემუქრა: "მე ამ უბანში ვცხოვრობ და პირადად მე მაქვს დავალებული ამ საქმის მოგვარება."

იმ დღეს დავრწმუნდი, რომ 2013 წლის ამნისტიის შემდეგ ხელისუფლებამ კრიმინალებს ქუჩის კონტროლი ჩააბარა - მოსახლეობა შიშში რომ ჰყოლოდათ, არჩევნების დროს კი ძალით დაეშინებინათ. "კაწრო" სწორედ ასეთი კრიმინალი იყო - ხელისუფლების რიგითი ქვეითი. მაგრამ პრინციპის საკითხი იყო - არ ვიყავი იმ ასაკში, რომ ვინმეს მიეთითებინა ჩემთვის რა გამეკეთებინა და რა არა.

2022 წლის 1 თებერვალს, მეორე პარტიის გაგზავნის დღეს, ოფისიდან დროებით გამოვედი. კარი რომ დავხურე, ოთხი ადამიანი თავს დამესხა. ზურგიდან მომცვივდნენ, მხოლოდ "კაწრო" ამოვიცანი. მან ძირს დამაგდო, წიხლებს მირტყამდა და მიყვიროდა: "რა გითხარი მე შენ?! თავი უკვდავი გგონია?!" რამდენჯერმე შევძელი დაყვირება, შემდეგ მოულოდნელად მუცელში სისველე ვიგრძენი...

დანით მთელი მუცელი გადამიჭრა. დიდი რაოდენობით სისხლი დავკარგე. მახსოვს, იმ მომენტში შევეგუე სიკვდილს - ვფიქრობდი, რამდენიმე წამში მოვკვდებოდი. შემდეგ გონება დავკარგე. როცა გამოვფხიზლდი, უკვე პალატაში ვიწექი, მუცელზე უამრავი ნაკერით. ჩემი თანამშრომლის და გამვლელების წყალობით გადავრჩი. სიცოცხლის ბოლომდე მათი მადლიერი ვიქნები.

(დაზარალებული ნიკოლოზ ჩუბინიძე მკურნალობის პროცესში)

 პალატაში გამომძიებელი გიორგი ამაღლობელი მოვიდა, რომელსაც დეტალური ჩვენება მივეცი - ავუხსენი, რომ თავდასხმა პოლიტიკას უკავშირდებოდა, რომ "კაწროს" ხელისუფლების იმედი ჰქონდა. მოვითხოვე მისი დაკავება და მართალია, ველოდი პასუხს, მაგრამ  არაფერი.

20 თებერვალს განყოფილებაში მივედი. იმან რაც იქ  მოხდა, შოკში ჩამაგდო. ამაღლობელმა დაიწყო ჩემი დადანაშაულება: "ყველაფერში პოლიტიკას რატომ ხედავ? ან საერთოდ მაგან ჩაიდინა თუ არა? საღამოს 9 საათზე, ზამთარში, სიბნელეში როგორ დაინახე მისი სახე? იქნებ უბრალო პატიოსანი ადამიანის დადანაშაულება გინდა, რადგან ხელისუფლებას უჭერს მხარს? ფულს ჰო არ გიხდიან ნაცები?!"  

მსხვერპლს დამნაშავედ აქცევდნენ, დამნაშავეს კი იფარავდნენ. მე - ადამიანს, რომლის  მოკვლაც  სცადეს - მეკითხებოდნენ "სააკაშვილთან კავშირზე" და "ხელისუფლების გადატრიალების გეგმებზე". ბოლოს ამაღლობელმა პირდაპირ მითხრა: "მეტჯერ აღარ გავიგო რომ დარეკე! არ გაქვს დამამტკიცებელი საბუთები. ფრთხილად იყავი და ოჯახს მიხედე, თორემ "სხვანაირი" ლაპარაკიც ვიცი!"

 განყოფილებიდან გამოსვლის შემდეგ არ ვიცოდი რა მომემოქმედებინა. მსგავსი უსამართლობა არასდროს მქონდა გამოცდილი. ადამიანი, რომელსაც ჩემი მოკვლა სურდა და თითქმის გამოუვიდა კიდეც, დაუსჯელი დადიოდა. პოლიცია, რომელიც ვალდებული იყო კრიმინალი დაეკავებინა, მას მფარველობდა. გენერალურ პროკურატურაში საჩივარი შევიტანე - რამდენიმე თვეში მომივიდა პასუხი: "ძიება შეწყდა დანაშაულის ნიშნების არარსებობის გამო". ორმაგი უსამართლობა.

სწორედ ამ მოვლენამ მომცა ბიძგი. 2022 წლის მარტიდან აქტიურად ჩავერთე პოლიტიკაში - "ერთიანი ნაციონალური მოძრაობის" ოფისში დავდიოდი, ქუჩის გამოკითხვებში, აქციებში ვმონაწილეობდი. კომპანიასთან ერთად რეგულარულად ვუმზადებდით პარტიას სააგიტაციო მასალებს. 20 ივნისს "შინ ევროპისკენ" მსვლელობაში მივიღე მონაწილეობა - ათასობით ადამიანთან ერთად. ვხვდებოდი, რომ საქართველოში დიქტატურა მყარდებოდა და თითოეულ ჩვენთაგანს ბრძოლის ვალი გვეკისრებოდა.

10 აგვისტოს ჩემს ხელმძღვანელს დაურეკეს: "იქ რომ გიზიან ნაცების ფანი ნაბიჭვრები, ჯობია შენი საქმე აკეთო, სანამ გადაგიწვით ეგ ოფისი!" როგორც მან განაცხადა  მე ვკურირებდი ამ თანამშრომლობას. ერთ კვირაში ჩემთანაც დაიწყეს რეკვა - იცოდნენ სად ვცხოვრობდი, ვისთან ვცხოვრობდი: "თუ არ გინდა შენი შვილი და ცოლი შენს თვალწინ დავასახიჩრო, თავი დაანებე მაგ პოლიტიკას!"

   1 სექტემბერს ფინანსური პოლიციის საგამოძიებო სამსახურში დამიბარეს , სადაც მეორე დღეს გამოვცხადდი- უცნაურია, რადგან უწყება ჩემს, არა კომპანიის ხელმძღვანელის სახელზე მოვიდა. გამომძიებელმა მამუკა არჩვაძე სამი საათის განმავლობაში მკითხავდა. აგრესიულად მეკითხებოდა: "რა ინტერესი გაქვს ნაციონალებთან თანამშრომლობაში? მოსყიდული ხო არ ხარ? კომპანიაში შენს პოზიციას პოლიტიკური დაკვეთებისთვის ხო არ იყენებ?" მაფრთხილებდა: "ყველაფერი სწორად მიპასუხე, თორემ მაგ ფეხებით დაგკიდებთ აქ!" და "ისე არ ქნა, რომ სახლში დაგადგეთ და რაიმე უკანონო გიპოვოთ - მოუწევს შენს ცოლს მარტომ ზარდოს შენი შვილი!"

  10 სექტემბერს ოფისში ჩხრეკა ჩაატარეს ზედაპირულად შეამოწმეს საბუთები და წავიდნენ. გასვლისას დაგვემუქრნენ: "კარგად მოიქეცით, თორემ ერთ დღეს სპეცრაზმიც კი შემოვაო!" ძალის დემონსტრირება იყო. გვაფრთხილებდნენ - ოპოზიციასთან თანამშრომლობა ცუდად დამთავრდებაო.

30 სექტემბერს სპეციალურ საგამოძიებო სამსახურში დამიბარეს, სადაც მეორე დღეს გამოვცხადდი. გამომძიებელმა კოტე მეტრეველმა თავიდან "სტანდარტულად" გამომკითხა - პოლიტიკურ შეხედულებებზე, სამსახურზე, "ერთიან ნაციონალურ მოძრაობასთან" თანამშრომლობაზე. შემდეგ პირდაპირ მითხრა: "არ დაგიმალავ - შენ ჩვენს მიზანში ხარ და ადრე თუ გვიან პრობლემები შეგექმნება. თუ გინდა ოჯახთან მშვიდად ცხოვრება, ჩვენთან თანამშრომლობა უნდა დაიწყო."

"რას გულისხმობთ?" - ვკითხე. "კომპანიაზე უნდა დაწერო ჩვენება, რომ პოლიტიზირებულები ხართ და უცხოური ორგანიზაციები გაფინანსებენ. მერე კი მსგავს ჩვენებებს დაწერ სხვა კომპანიებზეც, რომლებიც თქვენსავით თანამშრომლობენ იმ ნაბიჭვრებთან."

კანკალი დამეწყო. არ მინდოდა ცრუ ჩვენებები მიმეცა იმ ადამიანების წინააღმდეგ, რომლებიც არაფერში იყვნენ დამნაშავეები. მაგრამ მეტრეველმა დასძინა: "კარგად დაფიქრდი - არ გენდომება ანტისახელმწიფოებრივი საქმიანობისთვის წლებით ციხეში ჩაჯდომა, რისი რისკიც ძალიან დიდია შენს შემთხვევაში!"

  ორი დღე არავისთვის არაფერი მითქვამს. თავს ემოციურად ძალიან ცუდად ვგრძნობდი. არ მინდოდა მათი დავალების შესრულება, მაგრამ არც ოჯახის საფრთხეში ჩაგდება მსურდა. ბოლოს მივხვდი - ერთადერთი გზა ამ ყველაფრის  გასაჯაროება იყო, რომ სხვებსაც დაენახათ ჩემი ტკივილი და მმარტველი პარტიის რეალური სახე. 4 ოქტომბერს "ერთიანი ნაციონალური მოძრაობის" ოფისში შევხვდი ზვიად კუპრავას და ყველაფერი მოვუყევი - დაჭრაც, პოლიციის უმოქმედობაც, ფინანსური პოლიციის ზეწოლაც, სპეციალური საგამოძიებო სამსახურის შანტაჟიც. იმ დღესვე გავაკეთე კომენტარი მის  საჯარო განცხადებაზე.

 არ ვიცი მომავალში რა მელის. ვიცი - ეს ომია და არ ვიცი რა შედეგებს მომიტანს. 

სარედაქციო პოლიტიკის გათვალისწინებით ჩვენ ვცადეთ დაკავშირება საქართველოს შინაგან საქმეთა სამინისტროსთან და სპეციალურ საგამოძიებო სამსახურთან. შსს-ს პრეს-სამსახურმა განაცხადა, რომ "კონკრეტულ საქმეებზე კომენტარს არ აკეთებენ." აღსანიშნავია ის ფაქტიც, რომ არაერთი მცდელობის მიუხედავად, სპეციალური საგამოძიებო სამსახურის წარმომადგენელთან დაკავშირება ვერ მოხერხდა.

“ქართული ოცნების” დეპუტატი, ბექა ოდიშარია აღნიშნულ ფაქტთან დაკავშირებით ჟურნალისტთან საუბრისას აცხადებს : “ესენი არიან მატყუარა მოღალატეები, ზუსტად ასე დაარქვა ქართულმა საზოგადოებამ “ნაციონალ ნარჩენებს”, ადამიანებს, რომლებიც ფულს უცხოეთიდან ზუსტად იმისთვის იღებენ რომ მსგავსი სისულელეები ილაპარაკონ ! მე არ ვიცნობ ამ პიროვნებას(ჩუბინიძეს), თუმცა გარწმუნებთ რომ ამ სისულელეების არ მჯერა, მე მჯერა ჩვენი სამართალდამცავების და დარწმუნებული ვარ რომ თუ რამე მსგავსი ფაქტი დადასტურდა, ნებისმერი პირი მკაცრად დაისჯება, დაელოდეთ გამოძიების შედეგებს და მანამდე ამ მატყუარებისთვის აუდიტორიის დათმობით ნუ შეგყავთ საზოგადოება შეცდომაში”

ნიკოლოზ ჩუბინიძის ისტორია აჩვენებს, თუ რამდენად ღრმად არის პოლიტიზირებული საქართველოს სამართალდამცავი სისტემა "ქართული ოცნების" მმართველობის პირობებში. როცა კრიმინალები თავისუფლად დადიან და ხელისუფლების დავალებებს ასრულებენ, როცა პოლიცია მსხვერპლს დამნაშავედ აქცევს, ხოლო სპეცსამსახურები მოქალაქეებს ცრუ ჩვენებების მიცემას აიძულებენ - ეს აღარ არის სამართლებრივი სახელმწიფო. ეს არის ძალადობაზე აგებული რეჟიმი, რომელიც საკუთარი მოქალაქეების შიშით ინარჩუნებს ძალაუფლებას.

როცა ბეჭდვითი მანქანა, რომელიც ფლაერებს და პლაკატებს ამზადებს, სახელმწიფო უსაფრთხოებისთვის  საფრთხედ მიიჩნევა - ეს ნიშნავს, რომ თავისუფალი სიტყვა თავისთავად დანაშაულად წარმოადგენს . და ეს არის ის საქართველო, რომელსაც "ქართული ოცნება" უძღვება დიქტატურისკენ !