უკრაინის პრეზიდენტი ვოლოდიმირ ზელენსკი მადლობას უხდის შეერთებული შტატების პრეზიდენტსა და ამერიკელ ხალხს სამხედრო დახმარების ახალი პაკეტისთვის.
ზელენსკის თქმით, „ბრედლის“ ტიპის ჯავშანმანქანები სწორედ ის იყო, რაც უკრაინას ახლა ძალიან სჭირდება.
„გამოცხადებულია ახალი, ძალიან ძლიერი, ამერიკული თავდაცვის მხარდაჭერის პაკეტის შესახებ ჩვენი სახელმწიფოსთვის. ჩვენ, პირველად მივიღებთ „ბრედლის“ ჯავშანმანქანებს. ეს არის ის, რაც გვჭირდება, ახალი იარაღი და ჭურვები, მათ შორის მაღალი სიზუსტის. ახალი რაკეტები. ახალი დრონები. ეს დროულია. ამ მხარდაჭერის პაკეტის მთლიანი ღირებულება თითქმის სამი მილიარდი დოლარია. მადლობას ვუხდი პრეზიდენტ ბაიდენს, კონგრესმენებსა და ყველა ამერიკელს, რომლებიც აფასებენ თავისუფლებას და იციან, რომ თავისუფლების დაცვა ღირს“, – განაცხადა ზელენსკიმ.
აშშ-მა უკრაინისთვის სამხედრო დახმარების სახით, ახალი სამმილიარდიანი დაფინანსება გამოყო. ეს ყველაზე მასშტაბური დახმარების პაკეტია, რომელიც ერთჯერადად აშშ-ს ამ დრომდე გამოუყვია. საერთო ჯამში, ბაიდენის ადმინისტრაციამ უკრაინას 25 მილიარდამდე დოლარის ღირებულების დახმარება გაუწია.
