საქართველოში ვითარება მკვეთრად უარესდება – დემოკრატია უკუსვლას განიცდის, კანონის უზენაესობა სწრაფად სუსტდება, ფუნდამენტური უფლებები იზღუდება, ხოლო ევროკავშირში გაწევრიანების პროცესი დე ფაქტო შეჩერებულია. ამის შესახებ ევროკომისარმა გაფართოების საკითხებში მარტა კოსმა ევროპარლამენტში 2026 წლის გაფართოების პაკეტის წარდგენისას განაცხადა.
„საქართველოში ჩვენ ვაკვირდებით კანონის უზენაესობის ეროზიას და ფუნდამენტური უფლებების შეზღუდვას. საქართველოს ევროკავშირში გაწევრიანების პროცესი დე ფაქტო შეჩერებულია“, – აღნიშნა ევროკომისარმა.
კოსის განცხადებით, მიუხედავად ქვეყანაში არსებული ვითარებისა, საქართველოსთვის ევროპული ინტეგრაციის შესაძლებლობა კვლავ არსებობს, თუმცა ამისთვის ხელისუფლებამ პოლიტიკური კურსი უნდა შეცვალოს და დემოკრატიული პრინციპების დაცვას დაუბრუნდეს.
„ევროპის გზა რჩება გახსნილი, თუ საქართველოს ხელისუფლება შეიცვლის კურსს და კვლავ ერთგული იქნება დემოკრატიის, კანონის უზენაესობის და ფუნდამენტური უფლებების“, – განაცხადა მან.
ევროკომისარმა ხაზგასმით აღნიშნა, რომ საქართველოს ხელისუფლების მიმართ კრიტიკული შეფასებების მიუხედავად, ევროკავშირის მხარდაჭერა ქართველი ხალხის ევროპული მისწრაფებებისადმი უცვლელია.
„ჩვენი ერთგულება ევროკავშირში გაწევრიანებასთან დაკავშირებით ქართველი ხალხის მისწრაფების უცვლელია“, – განაცხადა მარტა კოსმა.
