რუსეთის არმია საგრძნობლად დასუსტდა ომის 11 თვის განმავლობაში, დაკარგა დიდი რაოდენობით პერსონალი და იარაღი, მაგრამ ის მაინც სახიფათოა, ამიტომ უკრაინის მხარდაჭერა არ უნდა შესუსტდეს, - ამის შესახებ ეროვნული უშიშროების საბჭოს სტრატეგიული კომუნიკაციების კოორდინატორმა ჯონ კირბიმ ვაშინგტონში გამართულ ბრიფინგზე განაცხადა.
”ეჭვგარეშეა, რომ რუსეთის არმია დღეს უფრო სუსტია, ვიდრე 11 თვის წინ იყო”, - თქვა მან.
მან განმარტა, რომ რუსებმა დაკარგეს დიდი რაოდენობით სამხედრო პერსონალი და რესურსი, მათ შორის ათასობით რაკეტა და თვითმფრინავი, რომლებიც მათ უკრაინის ტერიტორიაზე გაუშვეს.
კირბის თქმით, აღნიშნულის მუხედავად, რუსეთი კვლავინდებურად საშიშია, „რადგან უკრაინელები ყოველდღიურად იხოცებიან“.
„ამიტომ ჩვენ ორიენტირებულები ვართ იმაზე, რომ უკრაინამ შეძლიოს და გააგრძელოს საკუთარი თავის დაცვა და ქონდეს ბრძოლის ველზე წარმატების მიღწევის შესაძლებლობები“, - თქვა კირბიმ.
მან ასევე აღნიშნა, რომ შეერთებული შტატები ინარჩუნებს სამხედრო წარმომადგენლობას ევროპაში, რათა დაიცვას ევროპული უსაფრთხოების მოდელი, თუ რუსეთი გადაწყვეტს შეუტიოს ევროპას.
"შეერთებულმა შტატებმა ნათლად განუცხადა ნატოს მოკავშირეებს, განსაკუთრებით აღმოსავლეთ ფლანგზე, რომ ვასრულებთ ჩვენს პასუხისმგებლობას მე-5 მუხლის ვალდებულებების ფარგლებში“, - დაასკვნა კირბიმ.
