„ევროპული საქართველოს“ თავმჯდომარის, გიგა ბოკერიას შეფასებით, მიუნხენის კონფერენციაზე პრემიერ-მინისტრ ირაკლი ღარიბაშვილის სიტყვით გამოსვლა „მორიგი მავნებლობა“ იყო.
როგორც ბოკერია აცხადებს, დღეს საქართველოს სჭირდება ხელისუფლება, რომელიც მიიტანს მთავარ გზავნილს, რატომ არის ალიანსში საქართველოს ადგილი.
“ეს იყო მორიგი მავნებლობა, ყველა ნორმალური ხელისუფლება ამ დონის საერთაშორისო ტრიბუნას იყენებს საკუთარი ქვეყნის ეროვნული ინტერესების დასაყენებლად და გზავნილის მისატანად პარტნიორებისა და მსოფლიოსადმი. ამას აკეთებს უკრაინის ხელისუფლება ყოველ გამოსვლაზე. ამის ნაცვლად, ჩვენ მოვისმინეთ ცუდი კომენტატორის გზავნილები. არცერთი გზავნილი არ გაგვიგია, თუ რატომ არის საქართველო მნიშვნელოვანი დასავლეთისთვის. მოვისმინეთ მოპუტინისტო კომენტატორის გზავნილები, სხვას არაფერს არ ჰქვია ღალატი, თუ არა ასეთი საერთაშორისო ტრიბუნის არგამოყენებას საქართველოს ინტერესებისთვის”, - განაცხადა გიგა ბოკერიამ.
