საქართველოს პარლამენტის ადამიანის უფლებათა დაცვისა და სამოქალაქო ინტეგრაციის და განათლებისა და მეცნიერების კომიტეტების გაერთიანებულ სხდომაზე სიტყვიერი დაპირისპირება იყო, რის გამოც, სხდომაზე შესვენება გამოცხადდა.
დაპირისპირების მიზეზი გახდა თავდაცვის კოდექსი, რომელზეც საკუთარი პოზიცია დააფიქსირეს „გირჩის“ წარმომადგენლებმა. მათ შორის ერთ-ერთმა წარმომადგენელმა ისაუბრა რელიგიურ ორგანიზაცია „ბიბლიურ თავისუფლებასთან“ დაკავშირებით და თქვა, რომ „გირჩი“ სამხედრო სამსახურთან დაკავშირებით დაახლოებით 40 ათასამდე ადამიანს დაეხმარა. მათ განაცხადეს, რომ ამ ადამიანებს სახელმწიფო მონებად აქცევს, როდესაც სამხედრო სამსახურის გავლის ნაცვლად, მუშაობა ყარაულად, დარაჯად უწევთ.
„გირჩის“ წარმომადგენლების განცხადება დაგმო საქართველოს პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძემ. სარჯველაძემ „გირჩის“ წარმომადგენლებს მოუწოდა, ამ ადამიანების მიმართ ნუ იყენებენ სიტყვა „მონას“.
ამასთან, „მონის“ ხსენება გააპროტესტა პარტია „კანონი და სამართლის“ ლიდერმა, თაკო ჩარკვიანმაც, რის შემდეგაც სხდომაზე იყო ხმაური, სიტყვიერი დაპირისპირება და ამის გამო, შესვენება გამოცხადდა. შესვენების დროს კი, ერთმანეთს დაუპირისპირდნენ ვახტანგ მეგრელიშვილი და უმრავლესობის წევრი ვლადიმერ ჩაჩიბაია. მათ შორის იყო ფიზიკური დაპირისპირების მცდელობა.
ამ დროისთვის სხდომა განახლდა. სხდომაზე მსჯელობენ თავდაცვის სამინისტროს მიერ მომზადებულ თავდაცვის კოდექსზე, თავდაცვის რეფორმაზე, რასაც ეწინააღმდეგება პარტია „გირჩი“.
