ნაადრევია იმის დაჯერება, რომ რუსეთი, უკრაინაში სრულმასშტაბიანი ომის დროს მნიშვნელოვანი დანაკარგების მიუხედავად, დასუსტებულია და არ შეუძლია ახალი „სტრატეგიული სიურპრიზების“ მოწყობა, – ამის შესახებ ლატვიის თავდაცვის მინისტრმა, ინარა მურნიეცემ პოლონეთის ქალაქ ლეგიონოვოში ჩრდილოეთ ევროპის 12 ქვეყნის თავდაცვის მინისტრების შეხვედრაზე განაცხადა.
მურნიეცეს თქმით, შეხვედრის მონაწილეები თანხმდებიან, რომ რუსეთის აგრესიული ქმედება საფრთხეს უქმნის მთელი ევროატლანტიკული რეგიონის უსაფრთხოებას, სტაბილურობასა და კეთილდღეობას. სწორედ ამიტომ, ლატვიის თავდაცვის მინისტრის თქმით, აუცილებელია უკრაინისთვის სამხედრო მხარდაჭერის გაგრძელება.
„რეგიონში უსაფრთხოების წინაშე არსებული საფრთხეების მიუხედავად, ჩვენ მზად უნდა ვიყოთ იმისთვისაც, რომ რუსეთი გააგრძელებს თავისი ჰიბრიდული და ბირთვული მუქარების ფართო არსენალის გამოყენებას იმისთვის, რომ შეაშინოს და დაასუსტოს დასავლეთის უკრაინისადმი მხარდაჭერა“, – განაცხადა ლატვიის თავდაცვის მინისტრმა.
მურნიეცემ ასევე ხაზგასმით აღნიშნა, რომ დასავლეთი უნდა იყოს ერთიანი და თანმიმდევრული უკრაინის მხარდაჭერაში.
