„ეპიდემიური მდგომარეობა რთულია," - განაცხადა დღეს, 4 ნოემბერს, ჯანდაცვის მინისტრის მოადგილე თამარ გაბუნიამ უწყებათაშორისი საკოორდინაციო საბჭოს დასრულების შემდეგ.
მისივე თქმით, მდგომარეობის შესამსუბუქებლად ვაქცინაციის საინფორმაციო კამპანია მნიშვნელოვანია.
„ეპიდემიური მდგომარეობა რთულია. 5000-ზე მეტი შემთხვევა იყო დაფიქსირებული გასული 24 საათის განმავლობაში. გარდაცვალების რაოდენობამ გადააჭარბა 50-ს, რაც უკიდურესად საყურადღებოა. ჰოსპიტალში მობილიზებულია 8871 საწოლი, აქედან დაკავებულია 6648, მათ შორის, 1640 პაციენტი არის ინტენსიური თერაპიის განყოფილებაში და 338 არის რეანიმაციულ განყოფილებაში. ამასთან, ფუნქციონირებს კოვიდსასტუმროები და 45 ათასამდე პაციენტი იმყოფება ბინაზე ოჯახის ექიმების მეთვალყურეობის ქვეშ"
საკოორდინაციო საბჭომ იმსჯელა ვაქცინაციის პროგრამის გაფართოების შესაძლებლობებზე. კვლავაც ჩაითვალა, რომ აუცილებელია აქტიური საინფორმაციო კამპანიის გაგრძელება და მარათონის გაფართოება როგორც სოფლად, ასევე დიდ ქალაქებში, რადგან რამდენიმე დიდი ქალაქი ჩამორჩება 10 ან 15%-ით სამიზნე 60%-იან მაჩვენებელს და მნიშვნელოვანია ამ ქალაქებში სრულად მოხდეს ვაქცინაციის პროგრამის მოცვა. მათ შორის არის თბილისი, ბათუმი, შედარებით უკვე ნაკლები აცრილია ქუთაისში. მნიშვნელოვანია ამ ქალაქებში ვაქცინაციის მაჩვენებლის და პროგრამების გააქტიურება" - განაცხადა ჯანდაცვის მინისტრის მოადგილემ.
