საქსტატი მოსახლეობის აღწერის მეთოდოლოგიასთან დაკავშირებით განმარტებას ავრცელებს.
„სოციალური ქსელებით საზოგადოების გარკვეული ნაწილის მიერ ვრცელდება მცდარი ინფორმაცია 2024 წელს დაგეგმილი საყოველთაო აღწერის მეთოდოლოგიის შესახებ და მიზნად ისახავს მოსახლეობის შეგნებულად შეცდომაში შეყვანის მცდელობას. კერძოდ, არასწორად არის მიწოდებული ინფორმაცია აღწერაში გამოყენებული ტერმინის „მუდმივი მოსახლეობის“ შესახებ. აღნიშნულთან დაკავშირებით განვმარტავთ, რომ მოსახლეობის საყოველთაო აღწერა ტარდება გაერთიანებული ერების ორგანიზაციასთან (UN) მჭიდრო თანამშრომლობით. შესაბამისად, გაერო-ს მეთოდოლოგიის მიხედვით, პირი ითვლება მუდმივ მცხოვრებლად, თუ ის კონკრეტულ დასახლებულ პუნქტში ცხოვრობს 12 თვეზე მეტი პერიოდის განმავლობაში.
ამ მეთოდოლოგიას იყენებს გაერო-ს წევრი 200-მდე ქვეყანა და არავითარ კავშირში არ არის არჩევნებში პირის მონაწილეობასთან ან საქართველოს მოქალაქეობის მინიჭებასთან. იგი წარმოადგენს საერთაშორისოდ აღიარებულ სტატისტიკურ ტერმინს და გამოიყენება მხოლოდ მოსახლეობის რაოდენობის გასაანგარიშებლად. უნდა აღინიშნოს, რომ ანალოგიურ პირობებში არიან ჩვენი ემიგრანტები, რომლებიც წლებია, ცხოვრობენ სხვადასხვა ქვეყანაში (გერმანია, საბერძნეთი, აშშ, იტალია და ასე შემდეგ), არიან შესაბამისი ქვეყნისთვის მუდმივი მოსახლეობა, მაგრამ ეს მათ არ აძლევს იმ ქვეყანაში არჩევნებში მონაწილეობის უფლებას. ამასთან, აღწერა ტარდება არჩევნების შემდეგ (2024 წლის 14 ნოემბრიდან 19 დეკემბრამდე პერიოდში), შედეგები კი გამოქვეყნდება ექვს თვეში და, შესაბამისად, შემხებლობაში არ არის ერთმანეთთან“, – ნათქვამია ინფორმაციაში.
