მოძრაობა „რიონის ხეობის გადარჩენისთვის“ ერთ-ერთი ლიდერმა, ვარლამ გოლეთიანმა 20 ნოემბერს, 11:00 საათზე, თბილისში, გარემოს დაცვისა და სოფლის მეურნეობის სამინისტროსთან აქცია დააანონსა.
მისივე თქმით, აქციის მონაწილეები ელოდებიან გარემოს დაცვისა და სოფლის მეურნეობის მინისტრისგან, ოთარ შამუგიასგან პასუხს, „თუ რატომ არ აქვთ შენობაში შესვლის და კანონიერად პროტესტის გაგრძელების უფლება“.
„ყველას მინდა მოგიწოდოთ, რომ ხვალიდან ისევ შევიკრიბოთ. ხვალ, რადგან სამუშაო დღეა, 11:00 საათიდან აქ შევიკრიბოთ და მოვითხოვოთ, უშუალოდ გადაწყვეტილების მიმღებთან შეხვედრა. პოლიციასთან ლაპარაკი უკვე წარმოუდგენელია, ან უნდა შეგვიყვანონ შეგნებულად ხელჩართულ დაპირისპირებაში, ან უნდა ვიდგეთ აქ, გაუთავებლად, კი ბატონო, აქაც ვიდგებით! ჩვენ პოლიციასთან შეგნებულად აღარ ვისაუბრებთ, ხვალიდან ვითხოვთ, რომ მინისტრი გამოეხმაუროს ამ პროცესს, ვინც პატრონობს ამ დაწესებულებას და ვხედავთ, რომ არსებულ სივრცეში არ გვიშვებს, უკვე ორი დღეა დაჭერები და ქალების ცემა ამ პროცესს მოჰყვა. მე მგონი, საზოგადოება იმსახურებს იმას, რომ ვიცოდეთ მისი პოზიცია, რატომ არ გვიშვებს შენობის შიგნით. მინისტრმა გვითხრას, რატომ ვერ შევალთ ამ ტერიტორიაზე, თუ შევალთ გასაგებია, რომ შევალთ კარავი დაიდგმება შენობის შიგნით. მოვუწოდებ ჩვენს საზოგადოებას, ვინც თვალს გვადევნებს ბოლო ორი დღეა, ახლა დგას ჩვენს სიმრავლეზე ამ საკითხის გადაწყვეტის გზა, რამდენად გადაწყდება ეს საზოგადოების და ქვეყნის სასარგებლოდ. პოლიცია არ უნდა აღგვემატებოდეს რაოდენობით. ჩვენი კანონიერი უფლებაა, რომ შევიდეთ შენობის შიგნით, გავშალოთ კარავი და გავაგრძელოთ პროტესტი. ეს არის ჩვენი კანონიერი უფლება. გვაჩვენოს მინისტრმა კანონი, რის მიხედვითაც არ შეგვიძლია. ბუნებრივია, აქ ყველა, ვინც ვართ მთელი ღამე ვერ გაჩერდება, პირიქით მოგიწოდებთ, რომ წახვიდეთ სახლში და დაისვენოთ, იმისთვის, რომ ძალები აღიდგინოთ. ჩვენ აქ ვართ, ვიდრე ეს მოთხოვნები არ შესრულდება, ჩვენ აქედან ფეხს არ ვიცვლით“, - განაცხადა ვარლამ გოლეთიანმა.
პროტესტის მონაწილეების ძირითადი მოთხოვნაა, რაჭა-ლეჩხუმისა და ქვემო სვანეთის რეგიონში 2022 წლის მარტში 104 712 ჰექტარ ტყეზე 49-წლიანი სამონადირეო ლიცენზიის გაუქმება. ამასთან, პროტესტის მონაწილეების მოთხოვნაა გარემოს დაცვისა და სოფლის მეურნეობის მინისტრთან, ოთარ შამუგიასთან შეხვედრა და იმის გაგება, თუ რა გეგმა აქვს უწყებას რაჭის ტყეებთან დაკავშირებით.
საკითხს 18 ნოემბერს გამოეხმაურა გარემოს დაცვისა და სოფლის მეურნეობის სამინისტრო. უწყების განცხადებით, არ არსებობს საფუძველი საპროტესტო აქციების გასამართად და „ტყუილია, თითქოს რაჭაში ტყე გაიყიდა“. მათივე განმარტებით, სამონადირეო ლიცენზიის ძალადაკარგულად გამოცხადების საკითხი კანონმდებლობით გათვალისწინებული წესით შესაბამის ვადებში განიხილება.
