მინდა, გულწრფელად მივულოცო საქართველოს მთავრობას და ხალხს ევროკავშირის კანდიდატის სტატუსის მოპოვება. ამ პროცესში განსაკუთრებით ხაზს ვუსვამ როგორც ბატონ ღარიბაშვილის ხელმძღვანელობით მთავრობის, ასევე ხალხის როლს, – ამის შესახებ სომხეთის პრემიერ-მინისტრმა ნიკოლ ფაშინიანმა საქართველოს პრემიერ-მინისტრ ირაკლი ღარიბაშვილთან ერთად გამართულ ბრიფინგზე განაცხადა.
მისი თქმით, ეს ისტორიული მოვლენაა საქართველოსთვის, ასევე მთელი რეგიონისთვის.
„დღეს შედგა სომხეთსა და საქართველოს შორის ეკონომიკური თანამშრომლობის მთავრობათაშორისი კომისიის 13-ე სხდომა. მადლობა მინდა გადავუხადო ბატონ ღარიბაშვილს, ჩვენს ქართველ კოლეგებს, ამ სხდომის თბილისში მასპინძლობისთვისა და მაღალი დონის ორგანიზებისთვის. მინდა გულწრფელად მივულოცო საქართველოს მთავრობას და ხალხს ევროკავშირის კანდიდატის სტატუსის მოპოვება. ამ პროცესში განსაკუთრებით ხაზს ვუსვამ როგორც ბატონ ღარიბაშვილის ხელმძღვანელობით მთავრობის, ასევე ხალხის როლს. ეს ისტორიული მოვლენაა საქართველოსთვის, ასევე მთელი რეგიონისთვის. სიხარულით მინდა ხაზი გავუსვა, რომ 2019 წლის მთავრობათაშორისი კომისიის ფორმატის განახლების შემდეგ სხდომები ყოველთვის იმართება. დღეს ჩვენ განვიხილეთ საკითხთა ფართო სპექტრი, დაწყებული ეკონომიკით, დამთავრებული კულტურით, ვაჭრობით, ადამიანური ურთიერთობებით. ვისაუბრეთ ასევე სამხრეთ კავკასიის ინფრასტრუქტურაზე და კავშირების შესაძლებლობებზე. ეკონომიკური წინსვლისთვის ხაზი გავუსვით პროექტების შესრულების მნიშვნელობას. ასევე განვიხილეთ საკითხები, რომელიც ეხება მრავალ მიმართულებას“, – განაცხადა ფაშინიანმა.
