„წარუმატებლობა ვინმეს უნდა დაბრალდეს და როგორც ჩანს, ერთმანეთზე გადაბრალების პროცესი წავიდა", - განაცხადა, დღეს, 10 დეკემბერს, ოპოზიციონერმა დეპუტატმა სალომე სამადაშვილმა ჯანდაცვის მინისტრის ეკატერინე ტიკარაძის თანამდებობის დატოვების შეფასებისას.
მისივე თქმით, თანამდებობას არა მხოლოდ ჯანდაცვის მინისტრი, არამედ მთელი მთავრობა უნდა ტოვებდეს.
„საქართველოს კოვიდის მართვის მსოფლიოში ერთ-ერთი ყველაზე ცუდი მონაცემები აქვს. ჩვენ ვართ მერვე ადგილზე კოვიდის გავრცელების თვალსაზრისით, სიკვდილიანობის მაჩვენებლით - მეოთხე ადგილზე. ამ შემთხვევაში, მხოლოდ ჯანდაცვის მინისტრი კი არა, მთელი მთავრობა განცხადებას უნდა წერდეს და მიდიოდეს, როცა ასეთი სავალალო შედეგია, ყოველდღე უამრავი ადამიანი იღუპება. როცა მთავრობა ასეთი წარუმატებელია პროცესის მართვაში, ცხადია, შიდა განხეთქილება აუცილებლად შეიქმნებოდა, რადგან წარუმატებლობა ვინმეს უნდა დაბრალდეს და როგორც ჩანს, ერთმანეთზე გადაბრალების პროცესი წავიდა. თუ ეკატერინე ტიკარაძის შეხედულებებს ღარიბაშვილი არ ითვალისწინებდა, ის სწორად მოიქცა, რომ განცხადება დაწერა და წავიდა, მაგრამ ამით ვერ აიცილებს ხელისუფლება პასუხისმგებლობას იმაზე, რაც მოხდა, რადგან ამ შემთხვევაში, კოვიდის მართვის პროცესი არ არის მხოლოდ ჯანდაცვის მინისტრის პრეროგატივა და კატასტროფული შედეგი არის მთლიანად ხელისუფლების პასუხისმგებლობა. ეს ყველაფერი აჩვენებს, რომ „ქართულმა ოცნებამ" ქვეყნის მართვის რესურსი ამოწურა. ტიკარაძე, როგორც ვიცი, არის ბიძინა ივანიშვილთან ძალიან დაახლოებული ადამიანი და როგორ ჩანს, პარტიაში მისი დარჩენა ნიშნავს იმას, რომ ივანიშვილისთვის საკუთარი კადრების პარტიაში ყოფნა მნიშვნელოვანია", - განაცხადა სამადაშვილმა.
