თბილისის მერის თქმით, გლდანის რაიონში, ხიზანიშვილის ქუჩაზე სარეაბილიტაციო სამუშაოებში გამოვლენილი ხარვეზის გამო დედაქალაქის ბიუჯეტი რამდენიმე ათეული ათასი ლარით დაზარალდა. ამის გამო ეს საკითხი გამოსაძიებლად პროკურატურას გადაეცა. აღნიშნულ თემაზე კახა კალაძემ დღეს დედაქალაქის მთავრობის სხდომაზე ისაუბრა:
"ხიზანიშვილის ქუჩაზე ერთ გარკვეულ მონაკვეთზე იყო პრობლემები, მოხდა ახლად რეაბილიტირებული ასფალტის ჩაწევა, რაც სერიოზულ პრობლემას წარმოადგენდა. შიდა აუდიტს დავავალე მოკვლევა. შედეგად დადგინდა, რომ სანიაღვრე ქსელის არსებობის გაუთვალისწინებლობის გამო დოკუმენტაციაში იყო სერიოზული ხარვეზები და მთელი ჯაჭვი პრობლემების. დაახლოებით 85 000 ლარით დაზარალდა დედაქალაქის ბიუჯეტი. აღნიშნულ საკითხს ყურადღების გარეშე ვერ დავტოვებდით, ვლინდება სავარაუდო სისხლის სამართლის დანაშაული და ეს საკითხი გადაეგზავნება გამოძიებისთვის პროკურატურას," - განაცხადა კახა კალაძემ.
