რადიო თავისუფლების ინფორმაციით, 22 აპრილს ჯაშუშობის ბრალდებით დაკავებული პირი 27 წლის თამაზ გოლოევია (გოლოთი). გამოცემის ცნობით, მამით ოსი და დედით ქართველი თამაზი ცხინვალში სწავლობდა და ხშირად ჩადიოდა თბილისში.
რადიო თავისუფლება ბრალდებულის დედას ესაუბრა. მათი ინფორმაციით, თამაზი თბილისში ახალგორიდან 2026 წლის 22 აპრილს, დილით ჩავიდა და ჩასვლისთანავე დააკავეს. დედამ ეს ინფორმაცია ტელევიზორიდან გაიგო, თბილისში ჩამოვიდა, თუმცა არ მისცეს შვილთან შეხვედრის საშუალება.
საქართველოს პროკურატურამ გოლოევს და კიდევ 2 პირს ბრალდება დღეს წარუდგინა. მათ წინააღმდეგ გამოძიება საქართველოს სისხლის სამართლის კოდექსის 314-ე მუხლის პირველი ნაწილით (ჯაშუშობა) გრძელდება, რაც სასჯელის სახედ და ზომად 12 წლამდე თავისუფლების აღკვეთას ითვალისწინებს.
"სახელმწიფო უსაფრთხოების სამსახურის კონტრდაზვერვის დეპარტამენტის მიერ ჩატარებული გამოძიების შედეგად დადგინდა, რომ ბრალდებულები საქართველოს ინტერესების საწინააღმდეგოდ, უცხო ქვეყნის დაზვერვის სამსახურის დავალებით აგროვებდნენ და გადასცემდნენ სხვადასხვა სახის ინფორმაციას, მათ შორის: საქართველოს სამართალდამცავი ორგანოების და სტრატეგიული ობიექტების შესახებ მონაცემებს." - ნათქვამია უწყების მიერ გავრცელებულ განცხადებაში.
პროკურატურა ბრალდებულებისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს კანონით დადგენილ ვადაში მიმართავს.
