უკრაინა მზად არის მოლაპარაკებებისთვის, ომის დასრულების მიზნით, მაგრამ არ დანებდება და არ მიიღებს რაიმე სახის ულტიმატუმს, - „როიტერის" ცნობით, ამის შესახებ უკრაინის საგარეო საქმეთა მინისტრმა, დმიტრო კულებამ განაცხადა.
კულებას თქმით, მშვიდობიანი მოსახლეობის სიცოცხლის გადარჩენა შესაძლებელი იქნებოდა, უკრაინას საბრძოლო თვითმფრინავები, რომ ჰყავდეს, რაც ხელს შეუწყობს გრძელი სამხედრო კოლონების განადგურებას.
„ჩვენ ბრძოლას ვაგრძელებთ. მზად ვართ მოლაპარაკებისთვის, მაგრამ რაიმე ულტიმატუმის მიღებას და დანებებას არ ვაპირებთ", - განაცხადა კულებამ და აღნიშნა, რომ რუსეთი „მიუღებელ" მოთხოვნებს აყენებდა.
კულებას თქმით, ქალაქი მარიუპოლი ამჟამად ალყაშია, მაგრამ მაინც უკრაინის კონტროლქვეშ რჩება. საგარეო უწყების ხელმძღვანელმა აქვე დასძინა, რომ უკრაინას სჭირდება მეტი სამხედრო მარაგი და ბოლოდროინდელი სანქციების მიუხედავად, მეტი ნაბიჯებია საჭირო რუსეთის ეკონომიკაზე დარტყმების მისაყენებლად.
„მეტი თვითმფრინავი, რომ გვქონდეს, ჩვენ მეტი მშვიდობიანი ადამიანის გადარჩენა შეგვეძლება, იქიდან გამომდინარე, რომ რუსეთის ძირითადი დამრტყმელი ძალა ჰაერშია, რომელიც განურჩეველ თავდასხმებს ახორციელებს. ჩვენ გავაგრძელებთ ბრძოლას და უფრო და უფრო მეტი იარაღი დაგვჭირდება", - განაცხადა კულებამ.
ბელარუსზე საუბრისას უკრაინელმა დიპლომატმა აღნიშნა, რომ მას სჯერა, ოფიციალურ მინსკს უკრაინაში ჯარის გაგზავნა არ სურს, იმის მიუხედავად, რომ რუსეთის მხრიდან ზეწოლის ქვეშაა.
„მჯერა, რომ პრეზიდენტი ლუკაშენკო ხედავს უკრაინაში რუსული არმიის დანაკარგებს და არ სურს ამ ქვეყანაში თავისი ჯარები გაგზავნა. ჩვენ გვესმის, რომ პრეზიდენტი პუტინი მასზე დიდ ზეწოლას ახორციელებს", - დაამატა კულებამ.
საგარეო საქმეთა მინისტრის თქმით, უკრაინაში გამოყენებული რუსული ტაქტიკა სირიის ომის მსგავსია.
