სომხეთისა და ევროკავშირის ურთიერთობებზე ქართულ საჯარო სივრცეში დისკუსიის მახინჯი ფორმით წამოწყების მიზანი, „რუსულ ნარატივს ხომ არ ემსახურება, რომ ევროკავშირი საქართველოსთვისაც ცუდია, რომ კონსტიტუციიდან 78. მუხლი ამოსაღებია, რომ ევროპას კავკასიაში არაფერი ესაქმება და რომ არც საქართველოს არაფერი ესაქმება ევროკავშირში?!“- აცხადებს ეკონომიკის პროფესორი, გერმანიის ქრისტიანულ-დემოკრატიული კავშირის წევრი არჩილ იაკობაშვილი.
„რუსეთუმე ექსპერტებმა შეჭმუხვნული სახეებით ახალი ვითომ საჭირბოროტო თემა წამოიწყეს, "სომხეთს ევროკავშირთან არც სახმელეთო და არც საწყლოსნო შეხება არ აქვს, რის გამოც საერთოდ ევროკავშირში რა ესაქმება, თავისუფალი სავაჭრო სივრცე როგორ უნდა შექმნას, ვის დაკარგვიაო?"
ჯერ ერთი, ევროკავშირში მოქმედი რამოდენიმე წევრია კონტინენტთან სახმელეთო კავშირის გარეშე - მაგალითად, ირლანდია, მალტა, კვიპროსი.
მეორეც, თავისუფალი სავაჭრო სივრცე აქვს მაგალითად, იზრაელთან.
მესამეც, გრენლანდია, კანარები, გვადალუპი, მარტინიკი, კურასაო და სურინამიც ევროკავშირის ტერიტორიებია.
სადაც კანადის და ისლანდიის ევროკავშირში წევრობაზე საუბრობენ, იქ სომხეთმა, რომელსაც ასეთი დიდი ლობისტი გამოუჩნდა საფრანგეთის სახით, რა დააშავა ?!
ევროკავშირს ორმხრივი საბაჟო კავშირი აქვს თურქეთთან (აბა, 1990-იან წლებში ევროპიდან ამდენი ავტომანქანა როგორ შემოდიოდა საქართველოში თურქეთის ტერიტორიის გავლით?), რომლის ტრანზიტითაც მომავალში უპრობლემოდ შეძლებს, რომ ისარგებლოს სომხეთმაც.
ამ თემის ასე არაკვალიფიციურად შემოგდება ქართულ მედიასივრცეში ირიბად იმავე რუსულ ნარატივს ხომ არ ემსახურება, რომ ევროკავშირი საქართველოსთვისაც ცუდია, რომ კონსტიტუციიდან 78. მუხლი ამოსაღებია, რომ ევროპას კავკასიაში არაფერი ესაქმება და რომ არც საქართველოს არაფერი ესაქმება ევროკავშირში ?!“, - აცხადებს იაკობაშვილი.
