აშშ-ის პრეზიდენტის დონალდ ტრამპის განცხადებით, შეერთებულმა შტატებმა დღეს ირანთან ომი დაასრულა.
„არ ვიცი, გსმენიათ თუ არა, მაგრამ ჩვენ დღეს ირანთან ომი დავასრულეთ. დათანხმდნენ, რომ არასდროს ექნებათ ბირთვული იარაღი, რასაც ჩვენ დაჟინებით მოვითხოვდით; ეს იყო მთელი მიზანი. ეს იყო ყველაფრის 95 პროცენტი“, - აღნიშნა ტრამპმა.
აშშ-ის პრეზიდენტის დონალდ ტრამპის განცხადებით, აშშ-მა ირანთან ომის შესახებ შესანიშნავ შეთანხმებას მიაღწია.
„ახლახან მივაღწიეთ შესანიშნავ შეთანხმებას ირანთან ომის დასრულების შესახებ. ახლა დარჩენილია დოკუმენტების საბოლოო დამუშავება და, ვფიქრობ, ამას მომდევნო რამდენიმე დღეში დავასრულებთ. შესაძლოა, ხელი მოეწეროს, შესაძლოა, ევროპაში“, - აღნიშნა ტრამპმა.
მისი თქმით, დოკუმენტზე ხელმოწერისთანავე ჰორმუზის სრუტეც გაიხსნება.
ამასთან, აშშ-ის პრეზიდენტის თქმით, ის ესაუბრა რეგიონის ლიდერებს, მათ შორის სპარსეთის ყურის მოკავშირეებს და ისრაელის პრემიერ-მინისტრ ბენიამინ ნეთანიაჰუს.
„მთელი ახლო აღმოსავლეთი ძალიან ბედნიერია“, - აღნიშნა ტრამპმა.
კითხვაზე, რამდენად დარწმუნებულია, რომ ირანთან შეთანხმებას ამ შაბათ-კვირას მოაწერენ ხელს, აშშ-ის პრეზიდენტმა უპასუხა : „ეს მალე მოხდება, შესაძლოა ამ შაბათ-კვირას“.
ამასთან, კითხვაზე, დაეთანხმა თუ არა ირანის უზენაესი ლიდერი შეთანხმებას, ტრამპმა უპასუხა: „გავიგე, რომ პასუხი დადებითია“.
ირანის საგარეო საქმეთა სამინისტროს პრესსპიკერმა, ესმაილ ბაღაიმ განაცხადა, რომ შეერთებულ შტატებთან საბოლოო შეთანხმების შესახებ ინფორმაცია „მხოლოდ სპეკულაციაა“ და რომ თეირანს ჯერ არ მიუღია საბოლოო გადაწყვეტილება რაიმე შეთანხმებასთან დაკავშირებით.
