როგორც „დროას“ პრესსამსახურში აცხადებენ, ხოშტარიას ჯანმრთელობის მდგომარეობა შედარებით სტაბილურია, თუმცა იგი სრულად არ გამოჯანმრთელებულა და პერიოდულ სამედიცინო მეთვალყურეობას საჭიროებს.
„როგორც შეთანხმდნენ, დაახლოებით თვეში ერთხელ გადაჰყავთ კლინიკაში შემოწმებაზე. თვეში ერთხელ უწევს კონკრეტული პრეპარატის გაკეთება. მისი ჯანმრთელობის მდგომარეობა მეტ-ნაკლებად ნორმალურია. რომ ვთქვა, გამოჯანმრთელდა, ასე არ არის. ამ დროისთვისაც თოდუას კლინიკაშია“, – განუცხადეს პარტიის პრესსამსახურში „ინტერპრესნიუსს“.
ჯანმრთელობის მდგომარეობის გაუარესების გამო ხოშტარია რამდენიმე თვის წინ კლინიკა „ვივამედში“ გადაიყვანეს, საიდანაც 27 სექტემბერს რუსთავის ქალთა პენიტენციურ დაწესებულებაში დააბრუნეს.
შეგახსენებთ, ელენე ხოშტარია 2025 წლის 15 სექტემბერს თბილისის მერის, კახა კალაძის საარჩევნო ბანერის დაზიანების ბრალდებით დააკავეს. მან ბანერს წარწერა „რუსული ოცნება“ გაუკეთა.
პოლიტიკოსს თავდაპირველად აღკვეთის ღონისძიების სახით 5 000-ლარიანი გირაო შეეფარდა, რომლის გადახდაზეც უარი განაცხადა.
ხოშტარიას ბრალი საქართველოს სისხლის სამართლის კოდექსის 187-ე მუხლის პირველი ნაწილით წარედგინა, რაც სხვისი ნივთის დაზიანებას გულისხმობს, რამაც მნიშვნელოვანი ზიანი გამოიწვია.
მოგვიანებით, მოსამართლე გიორგი არევაძემ იგი დამნაშავედ ცნო და სასჯელის სახით ერთი წლითა და ექვსი თვით თავისუფლების აღკვეთა მიუსაჯა.
