რუსეთი განგებ ქმნის სასურსათო კრიზისს, რომ შიმშილი იარაღად გამოიყენოს. ამის შესახებ ირლანდიის პარლამენტის წევრებისადმი მიმართვისას უკრაინის პრეზიდენტმა, ვოლოდიმირ ზელენსკიმ განაცხადა.
ზელენსკის თქმით, რუსეთს ბლოკირებული აქვს უკრაინული პორტები და გემები ექსპორტისთვის განკუთვნილი სურსათით.
„მათთვის შიმშილი არის იარაღი ჩვენს წინააღმდეგ, რიგითი ადამიანების წინააღმდეგ, ეს არის დომინირების ინსტრუმენტი. ამ ღამით ჩვენს ტერიტორიაზე კვლავ განხორციელდა რუსეთის მხრიდან სარაკეტო დარტყმები, დაიბომბა სამოქალაქო ინფრასტრუქტურა, განხორციელდა დარტყმა ახალი ნავთობტერმინალზე, რუსეთი ამას სამიზნედ განიხილავს. ისინი ანადგურებენ ყველაფერს, რაც ხალხისთვის საარსებო წყაროს წარმოადგენს. ისინი დარტყმებს ახორციელებენ იმ ადგილებში, სადაც ჩვენ ვინახავთ საწვავს, სურსათს, სოფლის მეურნეობის აღჭურვილობას, სახნავ-სათესებს. ისინი მინდვრებს ნაღმავენ. რატომ აკეთებენ ამას? რადგან მათთვის შიმშილი ასევე იარაღია, იარაღი რიგითი ადამიანების წინააღმდეგ, ეს არის დომინირების ინსტრუმენტი. უკრაინა სურსათის მიმწოდებელი ერთ-ერთი წამყვანი ქვეყანაა მსოფლიოში. ჩვენი ექსპორტის გარეშე არის სურსათის დეფიციტი და შიმშილის საფრთხე. შიმშილის საფრთხე აზიისა და აფრიკის ათობით ქვეყნისთვის, შეიქმნება სურსათის დეფიციტი და გაიზრდება ფასები. ეს არის რეალობა მილიონობით მშიერი ადამიანისთვის", - განაცხადა ზელენსკიმ.
მან ასევე მოუწოდა ირლანდიის ხელისუფლებას დაარწმუნოს ევროკავშირის ქვეყნები, რომ მათ უფრო მკაცრი სანქციები დააწესონ პუტინის ინტერვენციის შესაჩერებლად.
ზელენსკის თქმით, რუსეთის ძალები მიზანმიმართულად ანადგურებენ უკრაინაში ინფრასტრუქტურას და პროვოცირებენ სასურსათო კრიზისს. უკრაინის პრეზიდენტის მონაცემებით, რუსეთის ქმედებების გამო ათი მილიონი უკრაინელი იძულებული გახდა, საცხოვრებელი სახლი და მშობლიური ქალაქი მიეტოვებინა.
„ეს არის ის, რასაც ჩვენ ვერ შევეგუებით, თუმცა ასევე ეს ნიშნავს, რომ რუსეთს ჯერ კიდევ არ უთქვამს უარი თავის გეგმებზე. ისინი კვლავ მიისწრაფვიან მთელი უკრაინელი ხალხის დამორჩილებისა და ოკუპირებისკენ. ჩვენ გვსურს, გავაკეთოთ მაქსიმალური, რათა ვაიძულოთ რუსეთი, ეძიოს მშვიდობა და დაგვანებოს თავი. ასე რომ გთხოვთ, გამოიჩინეთ უფრო მეტი ლიდერობა ომის საწინააღმდეგო კოალიციაში. მინდა, გთხოვოთ, დაარწმუნოთ ევროკავშირის პარტნიორები, წარადგინონ რუსეთის წინააღმდეგ უფრო მკაცრი სანქციები, რათა უზრუნველყონ, რომ რუსული ომის მანქანა გაჩერდეს. ჩვენ უნდა დავასრულოთ რუსეთთან ვაჭრობა, უნდა გავწყვიტოთ რუსული ბანკების კავშირები გლობალური სისტემისგან, გაწყვიტეთ მათი შემოსავლის წყაროები ნავთობისგან, რომელსაც ისინი იარაღისთვის და მკვლელობებისთვის იყენებენ", - განაცხადა ზელენსკიმ ირლანდიის პარლამენტისადმი მიმართვაში.
