სევეროდონეცკი დონბასში წინააღმდეგობის ეპიცენტრად რჩება, ზუსტად იქ წყდება ახლა ჩვენი დონბასის ბედი, – ამის შესახებ უკრაინის პრეზიდენტმა, ვოლოდიმირ ზელენსკიმ ვიდეომიმართვისას განაცხადა.
მისი თქმით, უკრაინელები იცავენ საკუთარ პოზიციებს. ქვეყნის პრეზიდენტი მადლობას უხდის ყველას, ვინც დონბასში იბრძვის.
„სევეროდონეცკი დონბასში წინააღმდეგობის ეპიცენტრად რჩება. ვიცავთ ჩვენს პოზიციებს და მტერს მნიშვნელოვან დანაკარგებს ვაყენებთ. ეს ძალიან სასტიკი ბრძოლაა. ერთ-ერთი ყველაზე რთული მთელი ამ ომის განმავლობაში. მადლობელი ვარ თითოეულის, ვინც იბრძვის ამ მიმართულებით. მრავალმხრივ, ზუსტად იქ წყდება ახლა ჩვენი დონბასის ბედი“, – განაცხადა ზელენსკიმ.
უკრაინის პრეზიდენტი აღნიშნავს, რომ რუსეთმა დონეცკი „ქალაქ მოჩვენებად“ აქცია და იქ ნორმალური ცხოვრება მხოლოდ ოკუპირებული ტერიტორიების უკრაინაში დაბრუნების შემდეგ იქნება შესაძლებელი.
ზელენსკის თქმით, 10 წლის წინ დონეცკი განვითარებული ქალაქი იყო, თუმცა შემდეგ რუსეთი მოვიდა.
„10 წლის წინ ჩვენი დონეცკი ძლიერი და განვითარებული ქალაქი იყო, თუმცა შემდეგ რუსეთი მოვიდა და ახლა ეს ქალაქი-მოჩვენებაა, რომელმაც დაკარგა უმეტესობა ადამიანების, ათასობით სიცოცხლე და აბსოლუტურად ყველა პერსპექტივა. მხოლოდ 10 წელი გავიდა და ისეთი შთაბეჭდილებაა, რომ ეს სხვა სამყაროში იყო. ზუსტად დღეს, აგრესორებმა გაავრცელეს სიახლე, თითქოს ისინი ემზადებიან საფეხბურთო კლუბების გასაერთიანებლად ოკუპირებულ ტერიტორიებზე ერთი ფსევდოჩემპიონატის ქვეშ – დონეცკიდან, ლუგანსკიდან, ხერსონიდან, მელიტოპოლიდან, ყირიმიდან და საქართველოს ტერიტორიის ნაწილიდანაც კი“, – განაცხადა ზელენსკიმ.
ზელენსკიმ ასევე მადლობა გადაუხადა პოლონეთის პრეზიდენტ ანჯეი დუდას უკრაინის ევროინტეგრაციის მხარდასაჭერად ტურნეში გამგზავრების გადაწყვეტილებისთვის.
„მადლიერი ვარ პოლონეთის პრეზიდენტ ანჯეი დუდასი და უკრაინელების ყველა მეგობრის, იმისთვის, რომ ის გაემგზავრა საგანგებოდ ევროპის ქვეყნებში უკრაინის ევროპული პერსპექტივების მხარდასაჭერად“, – განაცხადა ზელენსკიმ.
