აშშ-ის პრეზიდენტის, დონალდ ტრამპის განცხადებით, უკრაინა და რუსეთი შეთანხმდნენ, რომ ერთმანეთის ენერგეტიკულ ობიექტებზე დარტყმებისგან თავს შეიკავებენ.
„უკრაინა დათანხმდა, არ დაარტყას რუსეთის ენერგეტიკულ სამიზნეებს. რუსეთიც დათანხმდა!“ — წერს ტრამპი სოციალურ ქსელში.
აშშ-ის პრეზიდენტი ამავე განცხადებაში მსოფლიოში დიზელის საწვავის გაძვირებასაც შეეხო. მისი შეფასებით, ფასების ზრდის მთავარი მიზეზი რუსეთ-უკრაინის ომია და არა ირანთან დაკავშირებული ვითარება.
„მსოფლიოში დიზელის საწვავის ფასების ზრდა ძირითადად გამოწვეულია რუსეთ-უკრაინის ომით და არა ირანით“, — წერს ტრამპი.
მანამდე უკრაინის პრეზიდენტმა ვოლოდიმირ ზელენსკიმ განაცხადა, რომ კიევი მზად არის რუსეთის ენერგეტიკულ და კრიტიკულ ინფრასტრუქტურაზე დარტყმებისგან თავი შეიკავოს, თუ პარტნიორები უზრუნველყოფენ, რომ რუსეთიც შეწყვეტს უკრაინის შესაბამის ობიექტებზე თავდასხმებს.
