რუსეთის პრეზიდენტ ვლადიმირ პუტინის მიზანი უკრაინის ცალკეული ტერიტორიების დაკავებით არ შემოიფარგლება და მას მთელი უკრაინის რუსეთის ნაწილად ქცევა სურს. ამის შესახებ უკრაინის პრეზიდენტმა ვოლოდიმირ ზელენსკიმ CBS News-თან ინტერვიუში განაცხადა.
„მას მსოფლიოში ყველაზე დიდი ტერიტორია აქვს და რამდენიმე კილომეტრი სჭირდება? ამიტომ ძალიან უცნაურია, როდესაც ზოგიერთი პარტნიორი ამბობს: მას უკრაინის მხოლოდ ეს ნაწილი სჭირდება, ეს კილომეტრები და მეტი აღარ. მისი მიზანი ცალკეული ტერიტორიების ხელში ჩაგდებაზე გაცილებით ფართოა“, — განაცხადა ზელენსკიმ.
უკრაინის პრეზიდენტი ომის შესაძლო დასრულებასაც შეეხო და აღნიშნა, რომ ვერ ხედავს ისეთ გადაწყვეტას, რომელიც ერთდროულად უკრაინისა და რუსეთისთვის „მომგებიანი“ იქნება.
„ამ ომში ორივე მხარისთვის მომგებიანი შედეგი ვერ იქნება. ახლა ნამდვილი გამარჯვება ომის შეჩერებაა ადამიანების სიცოცხლის გადასარჩენად“, — განაცხადა ზელენსკიმ.
მისი თქმით, ომის დასრულების მთავარი მიზანი ადამიანების სიცოცხლის გადარჩენა უნდა იყოს და ეს შედეგი მნიშვნელოვანია არა მხოლოდ უკრაინისა და რუსეთისთვის, არამედ მთელი მსოფლიოსთვის.
